Դեռ երեկ երեկոյան Հոկտեմբերյանում ճանապարհային ոստիկանության աշխատակիցները մոտեցել են տաքսիների վարորդներին ու ստորագրություն վերցրել, որ այսօր դեպի Երևան ուղևոր չեն փոխադրելու: PanARMENIAN.Net-ի թղթակցի հետ զրույցում այս մասին ասաց Գոհար Իսախանյանը, որն ամեն առավոտ Հոկտեմբերյանից Երևան աշխատանքի է գալիս:
Նա նշեց, որ թեև առաջին հայացքից սա անհավանական ու անհեթեթ է թվում, սակայն երբ առավոտյան գնացել է ավտոկայան, ոչ տաքսիներ են եղել, ոչ էլ երթուղային միկրոավտոբուսներ:
«Ամբողջ ավտոկայանը լցված էր ուսանողներով ու աշխատանքից ուշացողներով: Իսկ այն հատուկենտ տաքսիներն էլ, որ սովորաբար 400 դրամով են Երևան բերում, այսօր 1000 էին պահանջում, մարդիկ էլ ճարահատյալ համաձայնվում էին»,- ասաց նա՝ նշելով, որ սա առաջին դեպքը չէ. «ՀԱԿ-ն այսօր ցույց ունի: Մենք արդեն չենք էլ զարմանում»:
Նմանատիպ ահազանգներ կան նաև Մասիս քաղաքից: «Մասիսում երբեք էլ այս օրերին երթուղայինները չեն աշխատում»,- ասաց Լուսինե Մկրտումովան:
«Առավոտյան ժամը 9-ից դեպի Երևան գնացող տրանսպորտ չկա՝ ոչ ավտոբուսներ, ոչ միկրոավտոբուսներ: Միայն տաքսիներ են, բայց չենք պատկերացնում՝ ոնց պետք է այսքան մարդ տեղափոխեն»,- ահազանգում են նաև Արտաշատի բնակիչները:
«Այդ երբվանի՞ց է ոստիկանությունը զբաղվում տրանսպորտի հարցով»,- PanARMENIAN.Net-ի թղթակցին ասաց Հայաստանի ոստիկանության մամլո խոսնակի օգնական Արմեն Մալխասյանը: Այն դիտարկմանը, թե ըստ ականատեսների հենց ոստիկաններն են տաքսիների վարորդներից «մարդ չտեղափոխելու մասին» ստորագրություն վերցրել, Մալխասյանը պատասխանեց. «Չկա նման բան»: