Մարտի 1-ին Երևանում մեկնարկել է Twinning ծրագրի հայտերի ներկայացման հերթական փուլը` Հայաստան-ԵՄ համագործակցության շրջանակներում: «Այսօրվա միջոցառման նպատակն է այս ծրագրի շրջանակներում պատասխանատուներին տեղեկացնել այն մասին, թե ինչպես է ընթանալու այդ գործընթացը, և սկսել հայտերի նախապատրաստում` դրանց քննարկման և շրջանառության մեջ դնելու համար»,-ասել է ՀՀ էկոնոմիկայի փոխնախարար Գարեգին Մելքոնյանը: Միջոցառմանը մասնակցելու համար հրավիրվել են պետկառույցի ներկայացուցիչներ, ովքեր հանդիսանում են տվյալ ծրագրի պաշտոնական շահառուներ:
Փոխնախարարը հայտնել է, որ որպես համագործակցության գործիք` Twinning-ը ֆինանսավորվում է ԵՄ կողմից:
Ըստ նրա, եվրոպացի փորձագետը պրակտիկ աջակցություն է ցուցաբերում տեղում` գերատեսչության տեղեկացվածությամբ և եվրոպական օրենսդրությանը համապատասխան: Մելքոնյանը նաև հավելել է, որ համագործակցության այլ գործիքների հետ համեմատած` այս մեկն ավելի երկարաժամկետ և փուլային է: