Այսօր շատ սրճարաններ, արագ սննդի ռեստորաններ, բարեր անվճար տրամադրում են Wi-Fi ծառայությունը: Սակայն աշխարհի հյուրանոցների շուրջ 2/3-ը շարունակում են վճար վերցնել անլար ինտերնետի համար: Նման հետևության է հանգել բրիտանական The Telegraph հրատարակությունը:

70 հյուրանոցային խմբերից ու անկախ հյուրանոցներից միայն 24 վարձավճար չեն գանձում Wi-Fi-ից օգտվելու համար: Լոնդոնի լյուքս դասի հյուրանոցներում սակագները հասնում են 20 ֆունտի՝ մոտ 20 եվրոյի մեկ օրվա համար:

Բրիտանական Holiday Inn ցանցի հյուրանոցներում հաճախորդները ստիպված են լինում վճարել մինչև 15 ֆունտ (մոտ 18 եվրո) մեկ օրվա համար, եվրոպական մայրցամաքում այդ վարձը կազմում է օրական մինչև 24 ֆունտ (մոտ 27 եվրո) օրական: Ընդ որում այդ ցանցի հյուրանոցների մեծ մասը ԱՄՆ-ում Wi-Fi անվճար է տրամադրում:

Wi-Fi-ի ամենաբարձր գինը սահմանվել է Marriott ցանցի հյուրանոցներում, ինչպիսիք են AC Hotel-ը Ֆլորենցիայում և JW Marriott-ը Կաննում, որոնք ստիպում են հյուրերին վճարել մեկ ժամվա համար 10 եվրո:

Բրիտանական TalkTalk պրովայդերի գնահատականներով ոչ մեծ հյուրանոցի (մինչև 100 համար) լայնաշերտ ինտերնետի հասանելիության համար ծախսերը կարող են կազմել 10-300 ֆունտ (կամ 12 եվրոյից-360 եվրո) ամսական, իսկ ավելի մեծ հյուրանոցների համար, որոնք մոտ 300 համար ունեն, 700 ֆունտ՝ մոտ 837 եվրո ամսական: