«Կարծում եմ, որ ցուցակի բովանդակությունը նվազեցրել է «Ժառանգության» հնարավորություններն ընտրություններում»,-Երևանում կայացած մամուլի ասուլիսում հայտարարել է կուսակցության նախկին քարտուղար Կարինե Հակոբյանը: Ինքը Հակոբյանը, որը կուսակցությունից դուրս է եկել հենց ցուցակի պատճառով, այն անտրամաբանական է համարում:

Անդրադառնալով «Ժառանգության» և «Ազատ դեմոկրատներ» համատեղ գործունեությանը, և պատասխանելով այն հարցին, արդյոք հնարավոր է , որ «դեմոկրատները» կլանեն «Ժառանգությանը», Հակոբյանն ընդգծել է, որ նման սպառնալիք չի տեսնում:

Այս համատեքստում նա հայտարարել է, որ «Ազատ դեմոկրատները» որպես առաջնորդ ճանաչում են Րաֆֆի Հովհաննիսյանին:

Ինչ վերաբերում է կուսակցության ղեկավարի դիրքին հենց «Ժառանգության» ներսում, ապա, ըստ նրա, այն շատ ամուր է, որի ապացույցը հրապարակված ընտրացուցակն է:

Մարտի 18-ին,«Ժառանգություն» կուսակցության վարչության նախագահ Րաֆֆի Կ. Հովհաննիսյանի ղեկավարությամբ կայացավ կուսակցության վարչության ընդլայնված նիստը: Վարչությունը քննարկեց եւ որոշեց կուսակցության Խորհրդի քննարկմանը ներկայացնել 2012թ. մայիսի 6-ին կայանալիք ԱԺ ընտրություններին մասնակցությանը, ինչպեսեւ կուսակցության կողմից առաջադրվող մեծամասնական թեկնածուների ցանկին եւ համամասնական ցուցակին վերաբերող հարցերը:

Ինչպես հայտնել է կուսակցության մամուլի ծառայությունը, վարչության նիստից անմիջապես հետո տեղի ունեցավ կուսակցության խորհրդի նիստ: Վարչության նախագահ Րաֆֆի Հովհաննիսյանը ներկայացրեց վարչության զեկույցը Հայաստանում քաղաքական իրավիճակի մասին: Խորհրդի անդամները ներկայացրեցին տեսակետներ առաջիկայում` մինչեւ խորհրդարանական ընտրություններ, ինչպեսեւ մայիսի 6-ից հետո կուսակցության մարտավարության եւ ռազմավարության վերաբերյալ: Այն նաեւ ձայների մեծամասնությամբ հաստատեց կուսակցության կողմից առաջադրվող մեծամասնական թեկնածուների ցանկը, ապա, հաշվի առնելով «Ազատ Դեմոկրատներ» կուսակցության հետ բանակցությունների ընթացքում ձեռք բերված համաձայնությունը` հաստատեց համամասնական ընտրակարգով այդ կուսակցության, քաղաքացիական հասարակության ներկայացուցիչների եւ «Ժառանգություն» կուսակցության հմատեղ ցուցակը, որում ներառված են Ստյոպա Սաֆարյանը, Զարուհի Փոստանջյանը, Արմեն Մարտիրոսյանը, Ռուբեն Հակոբյանը, Անահիտ Բախշյանը, Գագիկ Մակրյանը և այլք:

Ինչպես PanARMENIAN.Net ի թղթակցին հայտնել է կուսակցության մամուլի քարտուղար Հովսեփ Խուրշադյանը, կուսակցությունն առայժմ չի մեկնաբանում, ինչու են ցուցակնորում առաջատար տեղ զբաղեցնում հասարակական սեկտորի ներկայացուցիչներ, այլ ոչ թե գործող պատգամավորներ: Ըստ նրա, կուսակցությունը պաշտոնական հայտարարությամբ հանդես կգա երեքշաբթի: