Ենթադրվում է, որ Հայաստանում բացվելու է 15 օտարալեզու դպրոց

PanARMENIAN.Net - Հունիսի 9-ին ՀՀ ԱԺ-ում առաջին ընթերցմամբ քննարկվել է ՀՀ կառավարության կողմից ներկայացված օրինագծերի փաթեթը ՀՀ «Կրթության մասին» և «Լեզվի մասին» օրենքում շտկումներ մտցնելու մասին: Ներկայացնելով կառավարության օրենսդրական նախաձեռնությունը` կրթության և գիտության նախարար Արմեն Աշոտյանը նշեց, որ դպրոցների ոլորտում միջազգային ծրագրեր ներմուծելու և Հայաստանում մասնավոր օտարալեզու դպրոցներ բացելու համար, ինչպիսին են, օրինակ, բրիտանական դպրոցները, «AB» համակարգով դպրոցները, այդ օրենսդրական փոփոխություններն անհրաժեշտ են:

Աշոտյանի խոսքերով, Հայաստանի այդ դպրոցներում ուսուցումը սկսվելու է 7-րդ դասարանից: «Այսինքն, մինչև 7-րդ դասարան աշակերտները հաճախելու են հայկական դպրոց, որից հետո նրանք կարող են ընդունվել օտարալեզու դպրոց»,- նշել է Աշոտյանը և ավելացրել, որ բրիտանական դպրոցների ատեստատները համապատասխան կրեդիտների առկայության դեպքում հնարավորություն են տալիս շրջանավարտներին մեխանիկորեն ընդունվել Բրիտանիայի առաջատար բուհեր:

Նա հերքեց խոսակցություններն այն մասին, որ գոյություն ունեցող օրենսդրության հիման վրա կարելի է ներմուծել մասնավոր և միջպետական օտարալեզու դպրոցների համակարգ:

Նախարարն ընդգծեց, որ օտարալեզու դպրոցների թիվը, օրինագծերի վերոհիշյալ փաթեթի համաձայն, կկազմի 15: «Այդ 15 դպրոցները ստեղծվելու են Հայաստանում գոյություն ունեցող կրթական հաստատությունների հիման վրա և չեն ֆինանսավորվելու պետության կողմից»,- ասել է Աշոտյանը:

Իր հերթին, գիտության, կրթության, մշակույթի, երիտասարդության և սպորտի հարցերով ՀՀ ԱԺ մշտական հանձնաժողովի նախագահ Արտակ Դավթյանն ասաց, որ օրինագծերի տվյալ փաթեթի հարցով մինչև երկրորդ ընթերցումը խորհրդարանը լսումներ կկազմակերպի, որին մասնակցելու են բոլոր շահագրգիռ կողմերը:

 Ուշագրավ
Նրա նկատմամբ որպես խափանման միջոց է ընտրվել ստորագրությունը չհեռանալու մասին
Նախագիծը հավանության է արժանացել չզեկուցվող հարցերի փաթեթով
Կորոնավիրուսով ավելի վաղ վարակվել էին նաև երկրորդ ու երրորդ նախագահներ Ռոբերտ Քոչարյանն ու Սերժ Սարգսյանը
Ըստ նրա՝ Հիմնադրամը պետք է ղեկավարվի ոչ թե հասարակական հիմունքներով աշխատող տնօրեն, այլ լրիվ դրույքով աշխատող