Հայ իրավաբանները մտադիր են հանցագործությունները կանխել Ռուսաստանի օրինակով

PanARMENIAN.Net - Իրավաբանների և հոգեբանների միջազգային ասոցիացիայի նախագահ Խաչատուր Մարոզյանը և ասոցիացիայի հոգեբանական և սոցմանկավարժական բաժնի ղեկավար Արմինե Դավթյանն այսօր հրավիրված ասուլիսում տեղեկացրեցին, որ ՀՀ արդարադատության նախարարություն են ներկայացրել մի ծրագիր, որտեղ ներկայացրել են իրենց առաջարկները՝ հանցագործների կրկնահանցագործությունների կանխարգելման վերաբերյալ։

Արմինե Դավթյանի խոսքով, ծրագիրը բաղկացած է երեք կետից. «Առաջին կետում մենք առաջարկում ենք անչափահասների շեղվող վարքի կանխարգելմանն ուղղված աշխատանքներ։ Երկրորդ, մենք առաջարկում ենք քրեակատարողական հիմնարկներում վերադաստիարակչական աշխատանքներ տանել։ Ծրագրի այս մասում մենք կընդգրկենք էլ ավելի պրոֆեսիոնալ մասնագետների՝ հոգեբանների և մանկավարժների, որոնք կաշխատեն տարիքով մարդկանց հետ։ Դե իսկ երրորդ կետում առաջարկում ենք հոգեբանական աշխատանքներ տանել հանցագործների ընտանիքների, երեխաների հետ»։

Ըստ Խաչատուր Մարոզյանի, ասոցիացիան ցանկանում է կիրառել Ռուսաստանի փորձը. «Որոշ կալանավորներ մասնագիտություն չունեն։ Ռուսաստանում իրականացնում են հեռակա ուսուցում կալանավորների համար, այս փորձը մենք ցանկանում ենք կիրառել այստեղ, որպեսզի ազատ արձակվելուց հետո մարդը կարողանա աշխատել։ Հակառակ դեպքում կալանավորը սովորում է ապրել պետության հաշվին, կրկին հանցանք գործում և ետ գալիս կալանավայր»։

Խաչատուր Մարոզյանը և Արմինե Դավթյանը նաև հայտնեցին իրենց անհամաձայնությունը գործող օրենքի վերաբերյալ։ «Օրենքում կան կետեր, որտեղ ասվում է, որ պետք է կանխել հանցագործությունները և վերականգնել սոցիալական արդարությունը։ Սակայն, չկան ենթաօրենսդրական ակտեր, որոնք թույլ կտան կատարել այս օրենքը»,- ասաց Խաչատուր Մարոզյանը և ավելացրեց, որ իրենց առաջարկները ուղղված են հենց այս օրենքի իրագործմանը։