Հունահռոմեական ոճի ըմբշամարտիկ Ռոման Ամոյանը ոսկե մեդալ նվաճեց Գրան պրիում և դարձավ մրցաշարի լավագույն մարզիկը

Փետրվարի 17-24-ի գլխավոր սպորտային իրադարձությունների ամփոփում

Ըմբշամարտ. «Կարծում եմ` մեր ըմբշամարտիկները Մուրսկա Սոբոտա քաղաքում կայացած Գրան Պրիում լավ ելույթ ունեցան, քանի որ Հայաստանի հավաքականի չորս հիմնական անդամները մեդալներ են նվաճել»,- PanARMENIAN.Net ի թղթակցի հետ զրույցում ասել է Հայաստանի հունա-հռոմեական ըմբշամարտի հավաքականի գլխավոր մարզիչ, Օլիմպիական չեմպիոն Լևոն Ջուլֆալակյանը:

PanARMENIAN.Net - Օլիմպիական խաղերի բրոնզե մեդալակիր, ԱԱ և Եվրոպայի առաջնությունների արծաթե մեդալակիր Ռոման Ամոյանը (55կգ ք/կ) առաջին տեղն է զբաղեցրել, ինչպես նաև ճանաչվել է որպես առաջնության լավագույն ըմբշամարտիկ: Ոսկե մեդալ է նվաճել նաև Արթուր Շահինյանը (84կգ ք/կ):

«Ամեյանը Հայաստանի փորձառու մարզիկներից մեկն է և այս առաջնությունում նա ցույց տվեց իր լավագույն արդյունքը: Վահան Ջուհարյանը, որը բրոնզե մեդալ է նվաճել, առաջին անգամ էր ելույթ ունենում 66կգ քաշային կարգում և վատ արդյունք ցույց չի տվել»,- ընդգծել է Ջուլֆալակյանը:

Եվրոպայի չեմպիոն և ԱԱ արծաթե մեդալակիր Արսեն Ջուլֆալակյանը (74կգ ք/կ) նույնպես իր քաշային կարգում երրորդն էր: Գլխավոր մարզչի խոսքով, եզրափակիչ դուրս գալու համար անցկացված մենամարտում մրցավարները չհաշվեցին Ջուլֆալակյանի հնարքը, ուստիև նա դուրս չեկավ եզրափակիչ: Չնայած դրան, հավաքականի մարզիչը գոհ է ըմբշամարտիկի ելույթից:

«Կարևորը, որ նման մրցավարական սխալներ չլինեն Եվրոպայի առաջնությունում: Արդեն փետրվարի 27-ից մենք հաջորդ հավաքը կմեկնարկենք Երևանում` պատրաստվելով Եվրոպայի առաջնությանը: Այնտեղ մենք հանդես կգանք հիմնական կազմով և կփորձենք որքան հնարավոր է շատ մեդալներ նվաճել»,- ավելացրել է Ջուլֆալակյանը: Եվրոպայի առաջնությունը կկայանա Դորտմունդում (Գերմանիա) մարտի 29-ից ապրիլի 3-ը:

Ծանրամարտ. Փետրվարի 25-27 Երևանի Օլիմպիական ռեզերվի պետական սպորտդպրոցում կկայանա Հայաստանի ծանրամարտի առաջնությունը: Մրցաշարին կմասնակցեն ավելի քան 100 ծանրամարտիկներ: Այդ մասին PanARMENIAN.Net ի թղթակցին հաղորդեց Ծանրամարտի ֆեդերացիայի գլխավոր քարտուղար Փաշիկ Ալավերդյանը:

Առաջին մրցութային օրը ելույթ կունենան մինչև 56կգ քաշային կարգում հանդես եկող տղամարդիկ և կանայք: Նախքան Հայաստանի առաջնության մեկնարկը տղամարդկանց հավաքականի հիմնական անդամներն ուսումնամարզական հավաք են անցկացնում Ծաղկաձորում, կանայք` Գյումրիում:

Շախմատ. «Ծաղկաձորում հիմնական շախմատային պարապմունքներից բացի, որոնց վրա մենք ծախսում ենք օրական 4 ժամ, մենք 2 ժամ անցկացնում ենք նաև ֆիզիկական մարզումներ: Շախմատիստների համար շատ կարևոր է նաև ֆիզիկական պատրաստվածությունը»,-PanARMENIAN.Net ի թղթակցի հետ զրույցում ասել է Լևոն Արոնյանը, որը փետրվարի 2-ին Ծաղկաձորում անցկացնում է հավաք` պատրաստվելով աշխարհի չեմպիոնի հավակնորդների խաղերին:

Խաղերը տեղի են ունենալու մայիսի 3-27-ը Կազանում, իսկ Արոնյանի մրցակիցը լինելու է Ալեքսանդր Գրիշչուկը (Ռուսաստան): Հայ գրոսմայստերը խոստովանել է, որ Գրիշչուկը շատ ուժեղ շախմատիստ է և հետաքրքիր պարտիաներ է ցույց տալիս: «Ինձ հետ մարզվում են Գաբրիել Սարգսյանը, Հրանտ Մելքումյանը և Արման Փաշիկյանը: Հիմնականում մենք ուշադրություն ենք դարձնում խաղաքարերի դասավորությանը սկզբնախաղում»,- ասել է Արոնյանը և հավելել, որ փորձում է ուղղել իր թերությունները:

Կանանց Գրան պրիի վերջին փուլի երկրորդ տուրում, որն ընթանում է Քաթարում, Էլինա Դանիելյանը սպիտակ խաղաքարերով հաղթել է Մայա Չիբուրդանիձեին (Վրաստան): Դա հայ շախմատիստուհու երկրորդ հաղթանակն էր, որը երկու միավորով զբաղեցնում է 2-րդ տեղը` զիջելով միայն Նանա Ձագնիձեին (Վրաստան): Երրորդ տուրում Դանիելյանի մրցակիցն է լինելու Բաթույագ Մոնղոնտուլը (Մոնղոլիա), իսկ Մկրտչյանը պետք է խաղա Մարի Սեբագի (Ֆրանսիա) հետ:

Թենիս. Դավիթ Նալբանդյանը Copa Claro մրցաշարի քառորդ եզրափակիչում զիջել է Թոմի Ռոբրեդոյին և դուրս մնացել հետագա պայքարից: Մրցաշարի հաղթող է դարձել Նիկոլաս Ալմարգոն (Իսպանիա), որը եզրափակիչում հաղթանակ է տարել Խուան Իգնասիո Չելոյի նկատմամբ:

Փետրվարի 21-ին Թենիսի միջազգային ասոցիացիան (ATP) հրապարակել է աշխարհի ուժեղագույն թենիսիստների վարկանիշային ցուցակը: Արգենտինահայ թենիսիստ Դավիթ Նալբանդյանը նախորդ վարկանիշի համեմատ բարձրացել է մեկ հորիզոնականով և 1655 միավորով զբաղեցնում է 19-րդ տեղը:

Արգենտինայի թենիսի հավաքականի ավագ Մոդեստո Վասկեսը հայտնել է թենիսիստների անունները, որոնք պատրաստվում են Դևիսի գավաթի խաղին: Արգենտինայի հավաքականը խաղալու է Ռումինիայի հավաքականի դեմ մարտի 4-6-ը Բուենոս Այրեսում, հաղորդում է Associated Press-ը:

Հայաստանի հավաքականի կազմում են Դավիթ Նալբանդյանը, Խուան Մոնակոն, Խուան Իգնասիո Չելան և Էդուարդո Շվանկը: Թիմի հետ մարզումների պատճառով Նալբանդյանը բաց է թողել Ակապուլկոյի «Mexican Open» մրցաշարը:

Բռնցքամարտ. Հայ բռնցքամարտիկ Վանես Մարտիրոսյանի թիմը նրա համար մրցակից է գտել: Մարտիրոսյանը, որը պրոֆեսիոնալ ռինգում պարտություն չի կրել, ապրիլի 23-ին հանդիպելու է մեքսիկացի Սաուլ Ռոմանի հետ (34-8, 29 նոկ): Բռնցքամարտիկները մրցելու են WBC վարկածով արծաթե գոտու համար:

Այդ զույգի հաղթողը մրցելու է Սաուլ Ալվարես-Մեթյու Հաթոն զույգի հաղթողի հետ, որոնք ռինգ են դուրս գալու մարտի 5-ին փոքր միջին քաշային կարգում WBC վարկածով ազատ տիտղոսի համար:

Ֆուտբոլ. Հայաստանի ֆուտբոլի ֆեդերացիան հաստատել է Բարձրագույն լիգայի և երկրի Գավաթի 1/4 եզրափակչի ժամանակացույցը:

Հայաստանի առաջնությունը կմեկնարկի մարտի 5-ին, և առաջին տուրում «Արարատը», որը 2010 թվականին Առաջին լիգայի չեմպիոն դարձավ և Բարձրագույն Լիգայում ելույթ ունենալու իրավունք վաստակեց, կհանդիպի անցյալ մրցաշրջանի արծաթե մեդալակիր «Բանանցի» հետ:

«Միկան» Երևանում կհանդիպի Գյումրու «Շիրակի» հետ, Դիլիջանում «Իմպուլսը» կընդունի երկրի չեմպիոն «Փյունիկին», իսկ Գանձասարում տեղի «Գանձասար» թիմը կմրցի «Ուլիսի» հետ, PanARMENIAN.Net ին հաղորդել են ՀՖՖ մամլո ծառայությունից:

Հայաստանի Գավաթի քառորդ եզրափակչում «Ուլիսը» կհանդիպի «Արարատի» հետ, «Բանանցը»` «Գանձասարի», «Շիրակը»` «Փյունիկի», իսկ «Միկան»` «Իմպուլսի»: Հանդիպումները կկայանան մարտի 10-ին և 11-ին:

Կապանի «Գանձասար» ֆուտբոլային ակումբը Աշխաբադում և Ապադանայում արդեն 17-րդ անգամ ընթացող «Թուրքմենբաշիի Գավաթի» խաղարկության ժամանակ դուրս եկավ կիսաեզրափակիչ:

Փետրվարի 22-ին խմբային հանդիպմանը «Գանձասարը» 1:0 հաշվով հաղթեց Մախաչկալայի «Անժիի» երկրորդ կազմին: Սա Աբրահամ Խաշմանյանի սաների երկրորդ հաղթանակն է. առաջինը նույն հաշվով գրանցվեց «Ալթին Նասիրի» նկատմամբ: Փետրվարի 24-ին կայանալիք կիսաեզրափակչում «Գանձասարը» կմրցի «Օղաբ Գոնբադի» (Իրան) հետ:

Գոհար Նալբանդյան, Հասմիկ Բաբայան / PanARMENIAN News
 Ամենաընթերցվողը բաժնում
Մասնագետը՝ առողջ ապրելակերպի մասին
Ինչու են կանայք ընտրում ֆիթնես և բոդիբիլդինգ
Լավագույն app-երը՝ առավել զգուշավորների այլընտրանք
Ինչպես են մարզասրահները և մարզվողները «ֆորմի մեջ» մնում
 Ուշադրության կենտրոնում
Մարմնամարզիկ Արթուր Դավթյանը Աշխարհի գավաթի եզրափակչում է

Մարմնամարզիկ Արթուր Դավթյանը Աշխարհի գավաթի եզրափակչում է Ավելի վաղ եզրափակիչ էին դուրս եկել Արթուր Ավետիսյանն ու Վահագն Դավթյանը

 Բաժնի այլ նյութերը
Easy ֆուտբոլ՝ մեծ էկրանին Դարձիր «12-րդ խաղացող» Անգլիական այգում, երկրպագիր մերոնց մաքուր օդին
Ուղին անվանում է առաջնամագլցողը Հարմարավետության գոտուց դուրս, քաղաքային աղմուկից հեռու
Բրազիլական ջիու-ջիցուն Հայաստանում Գետնի վրա մենամարտել իմացողն առավելություն ունի
---