Մինչ քաղաքապետարանի ձեռնարկած միջոցներին անդրադառնալը, նշենք, որ մեր հրապարակումից մի քանի օր անց տեղադրվեցին պատուհաններ՝ սև ապակուց: Շինարարական աշխատանքները դեռ ամբողջությամբ չեն ավարտվել, քանի որ պատուհանները ամրացված չեն:

Քաղաքապետարան

Թե ինչ է պատասխանել քաղաքապետարանը Մշակույթի նախարարությանը, հայտնի չէ, բայց մեզ հայտնել են, որ նշված նախագիծը համաձայնեցվել է ՀՀ մշակույթի նախարարության հետ: Քաղաքապետարանի պատասխանում, մասնավորապես ասված է.

«Ի պատասխան Երևանի քաղաքապետարանին ուղղված Ձեր հարցման` աշխատակազմի քաղաքաշինության և հողի վերահսկողության վարչությունից տեղեկացնում են, որ Արշակունյաց պողոտա հ.9/4 հասցեում արտադրական տարածքի /նախկինում՝ Սառցակոմբինատի հ.1 մասնաշենք/ վերակառուցման շինարարական աշխատանքներն իրականացնելու համար առկա է Երևանի քաղաքապետարանի հետ 18.04.2008թ. համաձայնեցված հ.50-05/1-Վ-340-383 նախագիծը ու կառուցապատող «ՖՖԱ Ինվեստմենտ» ՍՊԸ-ին 06.06.2012թ. տրված հ.01/18-13712-416 շինարարության թույլտվությանը:

Միաժամանակ տեղեկացնում ենք, որ նշված նախագիծը 12.02.2008թ. համաձայնեցվել է նաև ՀՀ մշակույթի նախարարության աշխատակազմի պատմության և մշակույթի հուշարձանների պահպանության գործակալության կողմից և այն անցել է համապատասխան փորձաքննություն, որի հիման վրա տրվել է մասնագիտական դրական եզրակացություն ու ըստ հիշյալ նախագծի նախատեսվում է Արշակունյաց պողոտա հ.9/4 հասցեի շենքի՝ Արշակունյաց պողոտայի ճակատային մասի խուլ պատերին իրականացնել թվով հինգ ցուցափեղկերի ու մուտքերի բացվածքներ»։

Կառուցապատող ընկերություն

Փորձեցինք կառուցապատող ընկերությունից պարզել գոնե, թե ինչի համար են պատուհանները և շենքը հետագայում ինչ նպատակով է օգտագործվելու: «ՖՖԱ Ինվեստմենտ» ՍՊԸ տնօրենը մեզ հետ հեռախոսազրույցում ասաց, որ չգիտի՝ ինչ նպատակով է օգտագործվելու շենքը՝ նորաբաց պատուհաններով, հետո էլ տեղեկացրեց, որ շինարարությունն այժմ դադարեցվել է, քանի որ ինչ-որ խնդիրներ են ծագել: Հարցին, թե այդ դեպքում ինչպես եղավ, որ պատուհաններն, այնուամենայնիվ, տեղադրվեցին, նա պատասխանեց, որ դրանք տեղադրվել են, որ անձրև-ձյուն չլցվի ներս, մինչև պարզվի՝ ինչ է արվելու:

Ճարտարապետների միություն

«Մեկի հարցը չլուծած, մյուսն է առաջ գալիս»,- պատասխանելով Սառցակոմբինատի մասին հարցին՝ մեզ հետ զրույցում ասաց Ճարտարապետների միության նախագահ Մկրտիչ Մինասյանը: Մինասյանը չգիտի՝ ինչպես է եղել, որ պետության կողմից պահպանվող հուշարձանին վերաբերող նման թույլտվություն են տվել:

Թեև որոշ ճարտարապետներ մեզ ասացին, որ շենքը նախկին տեսքին բերելն այլևս հնարավոր չէ, և արդեն ուշ է ինչ-որ բան անելու համար, սակայն ճարտարապետների միության նախագահն ասաց, որ, իր տեղեկություններով, սեփականատերը խոստացել է դադարեցնել աշխատանքները և շենքը բերել նախկին տեսքին:

Մշակույթի նախարարություն

Տեղեկությունը ճշտելու համար ևս մեկ անգամ դիմեցինք Մշակույթի նախարարություն: Մեզ խոստացան այս ամենի վերաբերյալ առաջիկայում ամբողջական տեղեկատվություն տրամադրել: