Եվրանեսթի Միջխորհրդարանական վեհաժողովում հայկական պատվիրակության ղեկավար Վահան Հովհաննիսյանը, ամփոփելով Բաքվում Եվրանեսթի ընդլայնված նիստին պատվիրակության մասնակցության արդյունքները, լրագրողներին պատմել է հասարակ ադրբեջանցիների հետ իր շփման մասին: «Ես չնկատեցի հեռավոր հայկական լեռների համար կռվելու կամ մեռնելու ցանկություն»,-ընդգծել է նա:
Հովհաննիսյանը նաև ընդգծել է այն լավ ընդունելությունը, որ ադրբեջանական կողմը կազմակերպել էր հայկական պատվիրակության համար, մասնավորապես` անվտանգության ծառայության և սպասարկող անձնակազմի պրոֆեսիոնալ և ջերմ վերաբերմունքը:
Նա նաև հաղորդել է, որ հայ պատգամավորները Բաքվում զերծ էին մամուլի հետ շփումից, սակայն նա, «հեղափոխական հնարքներ կիրառելով», կարողացավ մի ադրբեջանական հեռուստաալիքի հարցազրույց տալ, թեև չգիտի արդյոք կթույլատրվի այն հեռարձակել:
Ապրիլի 3-ին Բաքվում տեղի ունեցած Եվրանեսթի Խորհրդարանական վեհաժողովի ընդլայնված նիստում Ադրբեջանի նախագահը իրեն թույլ է տվել հայերին կոչել «ֆաշիստներ»: Այդ հայտարարությունը դժգոհություն է առաջացրել նիստին ներկա գտնվող հայկական պատվիրակության մոտ: Վերջինս այն անվանել է ոչ կոռեկտ և դիվանագիտական նորմերի սահմաններից դուրս: Իրենց դժգոհությունն են արտահայտել նաև այլ երկրների պատվիրակության ներկայացուցիչներ:
Եվրանեսթի միջխորհրդարանական միավորմանն անդամակցում են Հայաստանը, Ադրբեջանը, Վրաստանը, Մոլդովան և Ուկրաինան:
