ԼՂՀ արտգործնախարար Աշոտ Ղուլյանը ԵԱՀԿ Մինսկի խմբի ամերիկյան նոր համանախագահ Սթիվեն Մաննի հետ կայացած հանդիպմամ ժամանակ հայտարարել է ղարաբաղյան հակամարտության կարգավորման շուրջ բանակցային գործընթացին Լեռնային Ղարաբաղի անմիջական մասնակցության համար պայմաններ ստեղծելու անհրաժեշտության մասին: Ինչպես տեղեկացնում է «Մեդիամաքս» գործակալությունը, Ղուլյանի եւ Մաննի հանդիպումը կայացել է ապրիլի 19-ին Երեւանում` ԼՂՀ մշտական ներկայացուցչությունում: Ս.Մաննի խնդրանքով, Աշոտ Ղուլյանը ներկայացրել է կարգավորման գործընթացի վերաբերյալ ղարաբաղյան կողմի դիրքորոշումը, ինչպես նաեւ տնտեսական եւ ներքաղաքական իրավիճակը հանրապետությունում: Ս.Մաննը հաստատել է ԵԱՀԿ Մինսկի խմբի շրջանակներում ղարաբաղյան հակամարտության կարգավորման գործընթացը շարունակելու ԱՄՆ հաստատակամությունը: Նա նաեւ հայտնել է տարածաշրջան կատարելիք հերթական այցի ընթացքում Լեռնային Ղարաբաղ այցելելու մտադրության մասին: