Հարավ-կորեական «Դեու Յունիթել» ընկերության Տաշկենտում գտնվող գրասենյակը եւ Արցախի «Ղարաբաղ տելեկոմ» ընկերությունը գործընկերության շուրջ համաձայնություն են կնքել: Այդ մասին տեղեկացրել է «Ազերթաջ» լրատվական ծառայությունը` նշելով, որ այդ փաստը հարուցել է Ադրբեջանի իշխանությունների սուր դժգոհությունը: Աղբյուրի համաձայն` Ուզբեկստանում Ադրբեջանի դեսպան Այդին Ազիմովը, «Դեու Յունիթելի» գլխավոր տնօրեն Խան Ենգ Սանգուի հետ հանդիպման ժամանակ հայտարարել է, թե նման քայլն անընդունելի է Ադրբեջանի համար: Ա.Ազիմովը հանդիպել է նաեւ Ուզբեկստանում Հարավային Կորեայի դեսպան Կիմ Սան Խվանի եւ Ուզբեկստանի ԱԳ նախարար Իլհամ Նեմատովի հետ, որոնց փոխանցել է Ադրբեջանի ղեկավարության դիրքորոշումն արտահայտող նամակը: Նամակում նշվում է, որ պաշտոնական Բաքուն «Ղարաբաղ Տելեկոմի» եւ «Դեու Յունիտելի» գործընկերությունը որակում է որպես «Ադրբեջանի տարածքային ամբողջականության խախտում» եւ Ուզբեկստանի իշխանություններից պահանջում է միջոցներ ձեռնարկել ընկերությունների համատեղ աշխատանքը կասեցնելու համար: