Ապրիլի 23-ին և 24-ին Կիպրոսում կայացել են մի քանի միջոցառումներ` նվիրված Հայոց ցեղասպանության զոհերի հիշատակին: Ապրիլի 23-ին Նիկոսիայում սկսվել է հայ երիտասարդության երթը, ովքեր տարել են Հայաստանի և եվրոպական երկրների դրոշները: Մասնակիցներն անցել են քաղաքի փողոցներով և կանգ առել Սուրբ Աստվածածնի եկեղեցու և «Նարեկ» վարժարանի մոտ:
Արմենիաս փողոցում երիտասարդությանը միացել են Նիկոսիայի հայ համայնքի ներկայացուցիչները: Այնուհետև հայ եկեղեցու Նահատակաց հուշարձանի մոտ տեղի են ունեցել միջոցառումներ: Դրանց մասնակցել են հայ համայնքի ներկայացուցիչ Վարդգես Մահտեսյանը և Կիպրոսի Ներկայացուցիչների պալատի խոսնակ Յանակիս Օմիրուն:
«Մենք պարտավոր ենք շարունակել պայքարը, որպեսզի արդարությունը հաղթի: Կիպրոսի հունական բնակչությունը միշտ աջակցելու է հայ ժողովրդին, քանի որ նա նույնպես եղել է թուրքական բռնության զոհ»,- ասել է Օմիրուն:
