ԱՄՆ Կոնգրեսի ներկայացուցիչների պալատի արտաքին հատկացումների կոմիտեն հուլիսի 10-ին հաստատել է երկրի 2005 թվականի բյուջեի նախագիծը, ըստ որի հաջորդ տարի Հայաստանին որպես տնտեսական օգնություն կհատկացվի 65 միլիոն դոլար, Լեռնային Ղարաբաղին` 5 միլիոն դոլար: Բացի այդ բյուջեի նախագծում վերականգնվել է Հայաստանին եւ Ադրբեջանին տրվելիք ռազմական օգնության հավասարաչափությունը` 5-ական միլիոն դոլար: Այդպիսով, ինչպես նշել են Ամերիկայի հայկական համագումարում, կոմիտեն մերժել է Բուշի վարչակազմի առաջարկած նախագիծը, ըստ որի Հայաստանին որպես օգնություն պետք է հատկացվեր 62 միլիոն, Ադրբեջանը պետք է ստանար քառապատիկ ավել ռազմական օգնություն Հայաստանի համեմատությամբ եւ բացառվեր օժանդակությունը Լեռնային Ղարաբաղին: Նշենք, որ հետագայում նախագիծը պետք է դրվի ԱՄՆ Կոնգրեսի Ներկայացուցիչների պալատի քննարկմանն ու քվեարկությանը: