Սիրիայում Եվրամիության դիվանագիտական առաքելությունը Դամասկոսում կաշխատի այնքան ժամանակ, «քանի դեռ դա հնարավոր է», չորեքշաբթի օրը հաղորդել է Եվրամիության ներկայացուցիչ Մայա Կոսյանչիչը:
Ինչպես հաղորդում է ՌԻԱ Նովոստին, Կոսյանչիչի խոսքով, այսօրվա դրությամբ ԵՄ ներկայացուցիչները շարունակում են աշխատանքը Դամասկոսում: Համապատասխան հայտարարությունը նա կատարել է` մեկնաբանելով մի շարք եվրոպական պետությունների դեսպաններին Սիրիայից արտաքսելու` երկրի իշխանությունների որոշումը:
ԵՄ ներկայացուցիչը նշել է, որ Եվրամիության երկրների աջակցությամբ որոշվել է մնալ Դամասկոսում` հաշվի առնելով նաև սիրիական ընդդիմության խնդրանքն ու Սիրիայում կատարվող իրադարձությունների մասին հավաստի տեղեկատվություն ունենալու ԵՄ անհրաժեշտությունը:
Ավելի վաղ Սիրիան հայտարարել է ԱՄՆ-ի, Մեծ Բրիտանիայի, Ֆրանսիայի, Շվեյցարիայի, Իտալիայի, Իսպանիայի դեսպաններին, ինչպես նաև Բելգիայի, Բուլղարիայի և Կանադայի հավատարմատարներին արտաքսելու մասին:
