ԵԱՀԿ նախագահության մանդատի գործողության մնացած երեք ամիսներին Բուլղարիան ամեն ջանք կգործադրի գոյություն ունեցող հակամարտություններից յուրաքանչյուրի կարգավորմանը հնարավորինս աջակցելու համար: Այդ մասին հայտարարել է ԵԱՀԿ գործող նախագահ, Բուլղարիայի արտգործնախարար Սոլոմոն Պասին: Նրա խոսքերով` հակամարտությունների գոտիներ կուղարկվեն կազմակերպության հատուկ ներկայացուցիչներ: Մասնավորապես, Լեռնային Ղարաբաղ կուղարկվի ԵԱՀԿ նորանշանակ հատուկ ներկայացուցիչ Ֆիլիպ Դիմիտրովը, հաղորդել է Ս.Պասին: «Մենք պետք է լինենք լավատես, եւ այդ լավատեսությունը հաղորդենք հակամարտության բոլոր ներկայացուցիչներին», - նշել է նա: ԵԱՀԿ գործող նախագահը հույս է հայտնել, որ միջազգային հանրության համատեղ համակարգվող ջանքերով եւ Ռուսաստանի աջակցության շնորհիվ այդ հակամարտությունները կարող են իրենց լուծումները գտնել ամենամոտ ժամանակներս: