Ազգային անվտանգության խորհրդի քարտուղար Արթուր Բաղդասարյանի և Հայաստանում ԵՄ պատվիրակության ղեկավար Տրայան Հրիստեայի համանախագահությամբ այսօր տեղի է ունեցել Եվրամիության խորհրդատվական խմբի Խորհրդի հերթական` տասներորդ նիստը:
Ինչպես PanARMENIAN.Net-ին հայտնում են ԱԱԽ մամուլի գրասենյակից` նիստին մասնակցում էին ՄԱԶԾ մշտական ներկայացուցիչ Դաֆինա Գերչևան, Հայաստանում հավատարմագրված ԵՄ երկրների դեսպանները և եվրոպական կառույցների ղեկավարները, ինչպես նաև ՀՀ պետական գերատեսչությունների ներկայացուցիչներ: Նիստի ընթացքում քննարկվել և հավանության է արժանացել ԵՄԽԽ 2012թ. երկրորդ կիսամյակի աշխատանքային ծրագիրը:
ԱԱԽ քարտուղար Արթուր Բաղդասարյանը դրական է գնահատել ՀՀ-ԵՄ համագործակցության ներկայիս մակարդակը և նշել, որ ՀՀ-ԵՄ 2012-2013թթ. ծրագրով նախատեսվում են բավականին լուրջ բարեփոխումներ, շուրջ տասը նոր ռազմավարություն և յոթ հայեցակարգ, որոնք վերաբերում են ՀՀ ոստիկանության համակարգին, մաքսային համակարգին, մարդու իրավունքների պաշտպանության խնդիրներին, տնտեսության և նաև առանձին ոլորտներին և ենթակառուցվածքներին:
Նիստի ընթացքում Խորհուրդը հաստատել է 2012թ.-ի հուլիս-դեկտեմբեր ամիսների աշխատանքային ծրագիրը, որով նախատեսվում է օժանդակություն և քաղաքականության հարցերով խորհրդատվություն տրամադրել պետական կառավարման, արդարադատության, ազատության և անվտանգության, ինչպես նաև ժողովրդավարության և մարդու իրավունքների ոլորտներում:
