Հոկտեմբերի 25-ին ԱՄՆ-ում Լեռնային Ղարաբաղի Հանրապետության մշտական ներկայացուցչությունում տեղի է ունեցել ԼՂՀ արտգործնախարար Աշոտ Ղուլյանի հանդիպումը ԵԱՀԿ Մինսկի խմբի ամերիկացի համանախագահ Սթիվեն Մաննի հետ: Զրույցի ընթացքում քննարկվել են ղարաբաղյան հակամարտության կարգավորման հեռակարների հետ կապված հարցերը` վերջին զարգացումների համատեքստում: Նշվել են հակամարտության կարգավորմանը խանգարող գործոնները, մասնավորապես, Ադրբեջանի չդադարող ռազմատենչ հայտարարությունները, որոնք ատելություն են հրահրում հայ ժողովրդի հանդեպ: Նշենք, որ հոկտեմբերի 23-ին ամերիկյան Անն Արբոր քաղաքում Ա.Ղուլյանը հանդես է եկել Միչիգանի համալսարանի կողմից կազմակերպված «Հայաստանը եւ Հարավային Կովկասը. արտաքին քաղաքականության մարտահրավերները» խորհրդաժողովի ժամանակ: Ինչպես տեղեկացրել են ԼՂՀ ԱԳՆ մամուլի ծառայությունից, իր ելույթում Ա.Ղուլյանը ներկայացրել է ղարաբաղյան հակամարտության նախապատմությունը, հակամարտության կարգավորման խնդրի առնչությամբ ԼՂՀ դիրքորոշումը, ինչպես նաեւ անդրադարձել է տարածաշրջանային անվտանգությանը: