Ինչպես տեղեկացնում է Բաքվի «Զերկալո» թերթը, օրերս Ադրբեջանում հիմնադրվել է «Համերաշխություն եւ վստահություն» ընտրական դաշինքը, որի ձեւավորմանը մասնակցել են 26 հասարակական կազմակերպություններ: Նոր կառույցի ղեկավար է ընտրվել «Հանուն Ադրբեջանի» դաշինքի Համակարգող խորհրդի նախագահ, Ռուսաստանյան Դաշնության գեներալ Իլգար Գասիմովը: «Ինչպես երեւում է, խորհրդարանական ընտրությունների նախաշեմին, Ադրբեջանի քաղաքական երկնակամարում հայտնվում է ռուսաստանամետ դիրքորոշման ուժային կենտրոն», գրում է թերթը: Ըստ «Զերկալո» թերթի` Վրաստանում եւ Ուկրաինայում Ռուսաստանի կրած անհաջողություններից հետո «ռուսները, երեւի, մտադիր են ռեւանշ վերցնել Ադրբեջանում»: Թերթի համաձայն` «նոր կազմակերպությունը «խորհրդարանական կարկանդակից կտոր» ստանալու մեծ հնարավորություններ ունի», քանզի այնտեղ ներկայացված են երկրի ազդեցիկ հասարակական քաղաքական գործիչները, իսկ «իշխանությունները վերաբերվում են դրականորեն կամ, ասենք, նայում են մատների արանքով»: