«Ազգ» թերթը տեղեկացնում է ԵԱՀԿ Լեռնային Ղարաբաղի շուրջ անվտանգության գոտու տարածքներում փաստահավաք հատուկ առաքելության երեկվա այցի մանրամասները: Ինչպես տեղեկացնում է թերթը, առաքելության անդամները վերադարձին այցելել են Քարվաճարում (Քելբաջարում, որը անվտանգության գոտու տարածքներից մեկն է) գտնվող միջնադարի հայկական մշակույթի հուշարձաններից մեկը` Դադիվանքը, որտեղ մոմեր են վառել: Դադիվանքը, որտեղ ըստ ավանդության` պահպանվել են սուրբ Թադեոս առաքյալի մասունքները, անվտանգության գոտու տարածքում գտնվող քրիտոնեական մշակույթի հուշարձաններից մեկն է, որոնք վկայում են մի ժամանակ այստեղ ծաղկում ապրած հայ քաղաքակրթության մասին, որը անկում է ապրել այդ հողերը անասնապահ մահմեդական ցեղերի բնակեցումից հետո: Թերթի թղթակցի տպավորություններով` առաքելության աշխատանքներին ներկա գտնված ԵԱՀԿ Մինսկի խմբի համանախագահները առանձնահատուկ խանդավառություն չեն դրսեւորել առաքելության հիմնական նպատակի առնչությամբ` գտնելով, որ հակամարտության կարգավորմանն ուղղված այդ քայլերը հազիվ թե արդյունավետ լինեն: