Հունաստանի հայ համայնքը 2 բողոքի ցույց է անցկացրել Հունաստանում Հունգարիայի դեսպանատան առջև՝ Հունգարիայում հայ սպա Գուրգեն Մարգարյանին կացնահարած և ցմահ ազատազրկման դատապարտված ադրբեջանցի Ռամիլ Սաֆարովի արտահանձնման դեմ: Ակցիաները տեղի ունեցան Աթենքում և Սալոնիկում, կազմակերպիչն էր ՀՅԴ «Հայ Դատի» հանձնախումբը:
Սալոնիկում ցուցարարները Սբ Աստվածածին եկեղեցու մոտից շարժվել են դեպի Հունգարիայի գլխավոր հյուպատոսություն, որտեղ հյուպատոսին բողոքի նոտա է հանձնվել:
Աթենքում ՀՅԴ հետ միասին ցույցի կազմակերպմանը մասնակցել է նաև Ռամկավար Ազատական կուսակցությունը:
Ցուցարարները հասել են Հունգարիայի դեսպանատուն, որը պահպանում էին ոստիկանները: Ցուցարարների մոտ է դուրս եկել դեսպանատան խորհրդականը, որին հանձնվել է բողոքի նամակը:
Ցույցը գլխավորել են 22 պատանի արցախցիներ, որոնք այցով գտնվում են Հունաստանում, հայտնում է Աթենքում լույս տեսնող Azad Or թերթը:
