Գերմանիայի Քրիստոնեա-ժողովրդավարական միության թուրք-գերմանական համաժողովի նախագահ Բյուլենթ Արսլանը հրաժարվել է մասնակցել Բունդեսթագի ՔԴՄ/ՔՍՄ խմբակցության Հայոց ցեղասպանության մասին հայտարարության քննարկումներին, տեղեկացնում է OTC գերմանական լրատվական ինտերնետ կայքը: Նրա խոսքերով` «դա շատ նրբախնդիր հարց է եւ չի կարող իրականորեն ներկայացվել Գերմանիայում»: «Դրսից ամեն միջամտություն կդժվարացնի հայ եւ թուրք ժողովուրդների մերձեցումը: Անհրաժեշտ է պատմությունն ընդունել օբյեկտիվորեն»,- նշել է նա: Նշենք, որ ՔԴՄ/ՔՍՄ խմբակցությունը մարտի սկզբին Բունդեսթագի քննարկմանն է ներկայացրել հայտարարություն, որտեղ կոչ է արվում Թուրքիային վերցնել իր վրա Հայոց ցեղասպանության համար պատասխանատվությունը: Հիշեցնենք, որ հայտարարության քննարկումը հետաձգվել էր կանաչների եւ սոցիալ-դեմոկրատների պնդմամբ, որոնք չէին ցանկանում հարաբերությունները փչացնել Թուրքիայի հետ Գերմանիայի կանցլեր Գերհարդ Շրեդերի Անկարա մեկնելու նախօրեին: Հայտարարության նախնական քննարկումը կկայանա ապրիլի 21-ին, իսկ քննարկումը կանցկացվի մայիսին կամ հունիսին` կանաչների եւ սոցիալ-դեմոկրատների պնդմամբ: