Հայաստանն ու Ռուսաստանը միշտ կարողացել են պայմանավորվել բնական գազի մատկարարաման գնի վերաբերյալ, հայտարարել է ՀՀ վարչապետ Տիգրան Սարգսյանը «Ինտերֆաքսին» տված հարցազրույցում՝ մեկնաբանելով որոշ ԶԼՄ-ների այն հայտարարությունները, թե երկու ռազմավարական գործընկերները չեն կարողանում պայմանավորվածության գալ գազի գնի շուրջ: Մասնավորապես, Ռուսաստանն առաջարկում է գինը հասցնել 330 դոլարի 1000 խմ գազի դիմաց:
«Կարող եմ ասել, որ չկան այնպիսի հարցեր, որոնց շուրջ մենք չենք կարող պայմանավորվել, և երբեք չեն եղել: Մենք միշտ պայմանավորվել ենք: Եվ այս դեպքում էլ մենք համաձայնության ենք եկել հիմնական սկզբունքների վերաբերյալ, մնում են տեխնիկական մանրուքները, որոնք մշակման կարիք ունեն»,-ասել է վարչապետը:
Միաժամանակ Սարգսյանը նշել է, որ բանակցային գործընթացի ժամանակ կոռեկտ չէ հանրության դատին հանձնել համատեքստից դուրս որևէ դրույթներ: «Դա սխալ է: Ուստի, երբ բանակցային գործընթացն ավարտվի, ամեն ինչ պարզ կդառնա»,-ասել է վարչապետը:
