Նախօրեին Ստեփանակերտում կայացել է Լեռնային Ղարաբաղի նախագահ Արկադի Ղուկասյանի հանդիպումը ԵԱՀԿ Մինսկի խմբի ղարաբաղյան հակամարտության հարցերով համանախագահներ Յուրի Մերզլկյակովի (Ռուսաստան), Սթիվեն Մանի (ԱՄՆ) եւ Բեռնար Ֆասյեի հետ (Ֆրանսիա): Համանախագահները տեղեկացրել են ԼՂՀ ղեկավարությանը Հայաստանի եւ Ադրբեջանի նախագահների, ինչպես նաեւ երկու երկրների արտգործնախարարների միջեւ հանդիպումների մասին, ներկայացրել են միջնորդ-երկրների մոտեցումները խաղաղ կարգավորման գործընթացում զգալի առաջընթացի հասնելու հեռանկարներների վերաբերյալ: Նրանք վերահաստատել են իրենց այն միտքը, որ ղարաբաղյան հիմնախնդրի կարգավորման գործընթացում առկա է նոր հնարավորություն` նշելով սակայն, որ խոսքը չի գնում հակամարտության կողմերին ներկայացված ինչ որ նոր առաջարկությունների մասին: Իր հերթին նախագահ Ա. Ղուկասյանը նշել է, որ չնայած տվյալ փուլում դեռեւս վաղաժամ է խոսել կարգավորման գործընթացի օրակարգում առկա հարցերի շուրջ հակամարտող կողմերի միջեւ սկզբունքային փոխըմբռնման մասին, առաջընթացի ակնկալիքներն, այնուամենայնիվ մեծ է: Նա հույս է հայտնել, որ համանախագահների ներկայիս այցը տարածաշրջան արդյունավետ կլինի եւ էլ ավելի կմոտեցնի բոլորին ղարաբաղյան հակամարտության խաղաղ եւ համապարփակ կարգավորմանը: Համանախագահները երախտագիտություն են հայտնել ԼՂՀ նախագահին կառուցողական զրույցի եւ փոխընդունելի կարգավորման տարբերակի որոնումը շարունակելու ղարաբաղյան կողմի պատրաստակամության համար: Հանդիպմանը մասնակցել է նաեւ ԼՂՀ արտգործնախարար Արման Մելիքյանը: