Հայաստանի արտաքին գործերի նախարարությունն ու ՀՀ դիվանագիտական ներկայացուցչությունները 2012թ. մի շարք քայլեր են ձեռնարկել Ցեղասպանության 100-ամյակի միջոցառումների կազմակերպման ուղղությամբ: Այս մասին այսօր լրագրողների հետ հանդիպման ժամանակ հայտնեց ՀՀ արտգործնախարար Էդվարդ Նալբանդյանը` ամփոելով ՀՀ ԱԳ նախարաության 2012թ.-ի աշխատանքները:
«Հայոց ցեղասպանության 97-րդ տարելիցի կապակցությամբ բազմաթիվ երկրներում անց են կացվել ոգեկոչման և հիշատակի հարյուրավոր միջոցառումներ, կազմակերպվել են կոնֆերանսներ և ցուցահանդեսներ, որոնց աջակցություն են ցուցաբերել ՀՀ դիվանագիտական ներկայացուցչությունները»,- նկատեց Էդվարդ Նալբանդյանը:
Նա նաև նշեց, որ արտաքին գործերի նախարարությունը 2012 թվականի ընթացքում շարունակել է աշխատանքները` ուղղված երկրի արտաքին անվտանգության ամրապնդմանը, երկրի զարգացման համար արտաքին բարենպաստ պայմանների ապահովմանը, միջազգային ասպարեզում մեր հեղինակության և դիրքերի ամրապնդմանը, տարբեր մայրցամաքներում Հայաստանի բարեկամների թվի ավելացմանը:
