Այսօր Հայաստանի արտգործնախարար Վարդան Օսկանյանը, որ Հունաստանում է գտնվում ՀՀ նախագահի այցի շրջանակներում, Աթենքում առանձին հանդիպում է ունեցել Հունաստանի ԱԳ նախարար Պետրոս Մոլիվիատիսի հետ, հաղորդում է ՀՀ ԱԳՆ մամլո ծառայությունը: Հանդիպման ընթացքում ծավալվեց մտքերի փոխանակություն փոխադարձ հետաքրքրություն ներկայացնող երկկողմ եւ միջազգային մի շարք հարցերի շուրջ: Հայաստանի եւ Հունաստանի ԱԳ նախարարները մասնավորապես քննարկեցին Հայաստանի եվրաինտեգրման ընթացքը ԵՄ նոր հարեւանության քաղաքականության շրջանակներում: Առանձին խոսակցության նյութ դարձան Հայաստան-Թուրքիա հարաբերությունները, հատկապես երեկ հրապարակված Թուրքիայի առաջընթացի մասին Եվրոպական հանձնաժողովի զեկույցի լույսի ներքո: Քննարկվեցին նաեւ տարածաշրջանային այլ հարցեր: Նախարար Օսկանյանն իր հույն գործընկերոջը տեղեկացրեց Լեռնային Ղարաբաղի հակամարտության կարգավորման շուրջ վերջին զարգացումների մասին: