Հայաստանի հանրապետական կուսակցությունը չի փորձում քաղաքականացնել Երևանի ավագանու ընտրությունները, ասում է ԱԺ «Հանրապետական» խմբակցության պատգամավոր Սուքիաս Ավետիսյանը և նկատում, որ տարբեր քաղաքական ուժեր փորձում են քաղաքականացնել ընտրություններն ու հայտարարում են իշխանությունը խլելու մասին, սակայն պարզ չէ, թե ումից են նրանք ցանկանում խլել իշխանությունը:
«Տարբեր քաղաքական ուժեր մինչև այժմ չգիտեն, թե ով է իրենց թեկնածուն և տարբեր անուններ են տալիս, սակայն թեկնածու է համարվում ցուցակի առաջին հորիզոնականում գտնվող անձը»,- այսօր մամուլի ասուլիսի ժամանակ նկատեց ՀՀԿ պատգամավորը:
Ինչ վերաբերում է իրենց քարոզարշավին, ապա ըստ պատգամավորի, բակային հանդիպումների ընթացքում իրենց թեկնածուն ավելի շատ ուշադրություն է դարձնում բնակիչների հետ շփումներին և ցանկանում է հենց տեղի բնակիչներից իմանալ նրանց հուզող խնդիրների մասին: «Տարոն Մարգարյանը բանավոր շատ լավ խոսք ունի, մեր թեկնածուն գրած տեքստեր չի արտասանում»,- ասաց նա:
Անդրադառնալով խոսակցություններին, թե ՀՀԿ-ում Տարոն Մարգարյանին արգելել են ուղիղ շփվել քաղաքացիների հետ, Սուքիաս Ավետիսյանը հայտարարեց, որ նման բան գոյություն չունի. «ՀՀԿ-ում նման հարցեր չեն քննարկվել, մեր թեկնածուն միշտ բաց է եղել լրատվամիջոցների հետ շփվելու համար»:
