Այսօր ՀՀ վարչական դատարանը կհրապարակի «Բարև Երևան» կուսակցությունների դաշինքի` ընտրությունների արդյունքները անվավեր ճանաչելու պահանջով հայցի դատավճիռը: Այս մասին PanARMENIAN.Net-ին հայտնում են «Բարև Երևան» կուսակցությունների դաշինքի մամուլի ծառայությունից:
Հիշեցնենք, որ մայիսի 13-ին Հայաստանի կենտրոնական ընտրական հանձնաժողովում «Բարև Երևան» կուսակցությունների դաշինքի լիազոր ներկայացուցիչ Լուսինե Պետրոսյանը ՀՀ վարչական դատարան էր ներկայացրել ԿԸՀ մայիսի 11-ին կայացրած 107-Ա որոշումը վիճարկելու մասին հայցադիմումը: ԿԸՀ այդ որոշումով ամփոփվել էին Երևանի ավագանու ընտրությունների արդյունքները, համաձայն որոնց` «Բարև, Երևանը» Երևանի ավագանիում ստացել է 6 մանդատ:
Դաշինքը դատարանին խնդրում է վերացնել որոշումը և ԿԸՀ-ին պարտավորեցնել քննարկելու «Բարև Երևան» դաշինքի մայիսի 10-ի դիմումը Երևանի ավագանու ընտրության արդյունքները անվավեր ճանաչելու մասին:
