Պետական ծառայության համակարգի աշխատավարձերի, կենասթոշակների և նպաստների չափերին կառավարությունը անդրադարձ կկատարի 2014թ-ի հունվարին՝ 2014-ի պետական բյուջեի շրջանակներում։ Այս մասին այսօր ԱԺ-ում լրագրողների հետ ճեպազրույցի ժամանակ հայտնեց ՀՀ աշխատանքի և սոցիալական հարցերի նախարար Արտեմ Ասատրյանը:
Նա նկատեց, որ կառավարության առաջիկա նիստում կքննարկվի նվազագույն ամսական աշխատավարձերի մասին օրենքում փոփոխություններ կատարելու մասին նախագիծը, որով առաջարկվել է հուլիսի մեկից նվազագույն աշխատավարձը սահմանել 45 հազար դրամ։ Օրնեքի նախագծի փաթեթը կներկայացվի ԱԺ քննարկմանը։
Հարցին, թե ի՞նչ կտա դա գազի գնի բարձրացմանը զուգահեռ, նախարարը պատասխանեց. «Երեսուն տոկոսով ավելացվում է նվազագույն աշխատավարձը և մեր հիմնական նպատակը աշխատող աղքատների խնդրի աստիճանական լուծումն է։ Այսինքն, այն չափը, որ առաջարկվում է, այսօրվա աղքատության շեմից ավելի բարձր նվազագույն աշխատավարձի չափ է»:
