ՀՀ նախագահին առընթեր ազգային անվտանգության խորհրդի քարտուղար, պաշտպանության նախարար Սերժ Սարգսյանն այսօր ընդունեց Հայաստանում Գերմանիայի դեսպան Հայկե Ռենատե Փայչին: Այդ մասին PanARMENIAN.Net-ի թղթակցին է հայտնել ՀՀ պաշտպանության նախարարության մամլո քարտուղար, գնդապետ Սեյրան Շահսուվարյանը: Հանդիպմանը դեսպանը նախարարին ներկայացրեց Հայաստանում Գերմանիայի պաշտպանության հարցերով նորանշանակ կցորդ, բրիգադի գեներալ Հայնց Գեորգ Վագներին: Վերջինս գոհունակություն հայտնեց, որ իրեն հնարավորություն է ընձեռվել մասնակցելու ՀՀ բանակի ստեղծման 14-ամյակին նվիրված տոնական միջոցառումներին: Կողմերը քննարկեցին ռազմական բնագավառում երկկողմ հարաբերությունների ներկա վիճակին եւ դրանք առավել խորացնելու հեռանկարներին առնչվող հարցեր: Մասնավորապես, անդրադարձ եղավ ռազմական կրթության ոլորտում կապերն ընդլայնելու խնդրին, որն առաջարկվեց ներառել հայ-գերմանական ռազմական համագործակցության տարեկան ծրագրում: