Նախագահ Ռոբերտ Քոչարյանն այսօր ընդունել է աշխատանքային այցով Երեւան ժամանած Իրանի Իսլամական Հանրապետության արտգործնախարար Մանուչեհր Մոթթաքիի գլխավորած պատվիրակությանը, հայտնում է ՀՀ նախագահի մամլո ծառայությունը:Քննարկվել են երկկողմ հարաբերություններին, էներգետիկ համատեղ ծրագրերի փաթեթին եւ Հայաստանում իրանական ներդրումներն ընդլայնելուն առնչվող հարցեր: Այս համատեքստում անդրադարձ է կատարվել հայ-իրանական տնտեսական համագործակցության միջկառավարական հանձնաժողովի վերջերս Թեհրանում կայացած նիստին, որը գնահատվել է որպես հարաբերությունների զարգացման նոր եւ կարեւոր քայլ:Կողմերն անդրադարձել են նաեւ Իրանի միջուկային ծրագրերի խնդրին, ինչի առիթով Իրանի արտգործնախարարը վերահաստատել է իր երկրի հավատարմությունը միջուկային էներգիան բացառապես խաղաղ նպատակներով կիրառելու գաղափարին: