2013 թ.-ի հունիսի 26-ին կայացրած որոշմամբ ՀՀ վճռաբեկ դատարանը վերջ դրեց Ինֆորմացիայի ազատության կենտրոնն ընդդեմ Հայաստանի դեմոկրատական կուսակցության դեռևս անցյալ տարի սկիզբ առած դատական գործին` ուժի մեջ թողնելով ԻԱԿ-ի օգտին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի կայացրած վճիռը:

ՀԴԿ-ն անպատասխան էր թողել 2012 թ.-ի ապրիլի 25-ին ԻԱԿ-ի ուղարկած հարցումը, ինչպես նաև 2012 թ.-ի մայիսի 16-ի կրկնակի հարցումը, որոնցով ԻԱԿ-ը խնդրել էր հայտնել Հայաստանի դեմոկրատական կուսակցությունը 25.04.2012թ.-ի դրությամբ որքան գումար է ծախսել նախընտրական քարոզարշավ իրականացնելու համար և ծախսած գումարներից որքան են կազմում կուսակցության սեփական միջոցները, որքանը՝ կուսակցությանը կատարված նվիրատվությունների գումարը:

Դատարանն ամբողջությամբ բավարարեց ԻԱԿ-ի պահանջը ճանաչել «Ինֆորմացիայի ազատության կենտրոն» ՀԿ-ի տեղեկատվություն ստանալու իրավունքի խախտման փաստը և պարտավորեցնել Հայաստանի դեմոկրատական կուսակցությանը տրամադրելու պահանջվող տեղեկատվությունը: Դատարանը նաև պարտավորեցրեց կուսակցությանը փոխհատուցել ԻԱԿ-ի կողմից վճարված պետական տուրքի գումարը և փաստաբանի վարձատրության գումարը` 100.000 դրամի չափով: