«Վրաստանի վարչատարածքային բաժանումը ներառում է երեք ինքնավարություն` Հարավային Օսեթիան, Աբխազիան եւ Աջարիան: Այլ ինքնավարություններ մենք չենք ստեղծելու»,-այսօր Երեւանում հայտարարել է Հայաստանում Վրաստանի դեսպան Ռեվազ Գաչեչիլաձեն: Նրա խոսքերով, վերը նշված ինքնավարություններն ուղղակի տարբեր կարգավիճակներ կունենան, որոնք կորոշվեն հետագայում: Ազգային փոքրամասնությունների կոմպակտ բնակությունը Վրաստանում պարտադիր պայման չէ, ասենք, ադրբեջանական կամ հայկական ինքնավարություն ստեղծելու համար»,-ասել է նա: Միեւնույն ժամանակ նա ընդգծել է, որ առանց բացառության Վրաստանի բոլոր քաղաքացիներն ունեն միեւնույն իրավունքներն ու պարտավորությունները: Հիշեցնենք, որ Ջավախքի մի շարք հայկական կազմակերպություններ դիմել են Վրաստանի կառավարությանը պահանջելով ինքնավարության կարգավիճակ տալ շրջանին: