Նախօրեին ՀՀ Հանրային խորհրդում տեղի ունեցած քննարկման ընթացքում, որը նվիրված էր «Զվարթնոց» օդանավակայանի հին կլոր շենքը քանդելու առաջարկին, Քաղավիացիայի գլխավոր վարչության ներկայացուցիչ Աշոտ Ազիզյանը ներկայացրեց «Արմենիա» միջազգային օդանավակայաններ» ՓԲԸ բիզնես-պլանը: Գալիք տարի նախատեսված աշխատանքների թվում կա օդանավակայանի հին շենքը քանդելու մասին դրույթը: Ըստ ՔԱԳՎ ներկայացուցչի, շենքը գտնվում է «անմխիթար վիճակում» և նրա ամրացման համար կպահանջվի 10-12 մլն դոլար: Բանն այն է նաև, որ կառավարիչը մտադիր է ընդլայնել օդանավակայանը դեպի աջ, սակայն հին շենքը խանգարում է դրան:
Քննարկմանը մասնակից ճարտարապետները դեմ հանդես եկան օդանավակայանի հին շենքը քանդելու առաջարկին: Այդպես, ճարտարապետ Հրաչ Պողոսյանը ուշադրությունը հրավիրեց այն հանգամանքի վրա, որ ընդլայնումը կարելի է նաև դեպի ձախ կատարել: Ավելին, մի քանի տարի առաջ շենքը գործում էր և հարկավոր է եզրակացություն ներկայացնել նրա սեյսմիկ վիճակի մասին, ոչ թե հապճեպ քանդել:
Հանրային խորհրդի օդային տրանսպորտի ենթահանձնաժողովը ևս ներկայացրեց իր դիրքորոշումը: Ենթահանձնաժողովի ներկայացուցիչ Իզաբելլա Մուրադյանը նշեց, որ կլոր շենքը թույլ է տալիս միաժամանակ ընդունել մի քանի խոշոր օդանավեր, իսկ նոր շենքը նման հնարավորություն չի ընձեռում: «Կլոր շենքի տարածքում կարող է գործել նաև տարանցիկ գոտին: Ուստի մենք դեմ ենք օդանավակայանի հին շենքի քանդմանը»,-հայտարարել է նա:
Քննարկման արդյունքում ՔԱԳՎ ներկայացուցիչ Աշոտ Ազիզյանն ասել է, որ իրենք հավանություն կտան այն որոշմանը, որը կընդունի Հանրային խորհուրդը:
Ինչպես ավելի վաղ PanARMENIAN.Net -ին հայտնել էր Հանրային խորհրդի մամուլի քարտուղար Անի Գասպարյանը, Քաղավիացիայի գլխավոր վարչության պետ Արտեմ Մովսիսյանը մոտ մեկ ամիս առաջ դիմել էր Հանրային խորհրդին՝ այդ հարցի շուրջ հանրային քննարկումներ անցկացնելու խնդրանքով: «Նա հիմնավորեց դա նրանով, որ ՀՀ կառավարությունն ու «Արմենիա» միջազգային օդանավակայաններ» ՓԲԸ-ն քննարկում են զարգացման ծրագիրը և չի բացառվում, որ հին շենքը քանդվի»,- ասաց նա:
«Զվարթնոց» օդանավակայանի մամուլի ծառայությունում PanARMENIAN.Net ին ասացին, որ օդանավակայանի հին կլոր շենքը քանդելու նոր հայտ քաղաքապետարան չեն ներկայացրել:
Երևանի քաղաքապետարանին կից քաղաքաշինական խորհուրդն ավելի վաղ մերժել էր «Զվարթնոց» օդանավակայանի հայտը՝ «հին շենքը քանդելու թույլտվություն» ստանալու համար:
2013 թ. ապրիլի 29-ին ՀՀ ճարտարապետների միության նախագահ Մկրտիչ Մինասյանը մտավախություն էր հայտնել, որ արգենտինահայ գործարար Էդուարդո Էռնեկյանին պատկանող ընկերությունը, որի կառավարմանն է հանձնված օդանավակայանը, կարող է «ավելորդ» համարել հին շենքն ու քանդել այն: Ըստ նրա, ժամանակին շենքն արժանացել է համամիութենական մրցանակի և պատմամշակութային հուշարձան է: «Պետք է հարգել շենքի հեղինակներին ու ճարտարապետներին: Անհրաժեշտ է աչքի լույսի պես պահել հուշարձան հանդիսացող շենքերը: Քանդելով դեռ ոչ ոք քաղաք չի կառուցել»,- ասել էր ճարտարապետը:
2011 թվականին բացվեց օդանավակայանի նոր տերմինալը, որը համապատասխանում է բոլոր միջազգային չափանիշներին: 1961 թվականին բացված «Զվարթնոց» միջազգային օդանավակայանի մոդեռնիստական ոճի հին շենքը շահագործման էր հանձնվել 1980 թվականին ճարտարապետներ` Արթուր Թարխանյանի, Սպարտակ Խաչիկյանի, Լևոն Չերքեզյանի, Ժ. Շեխլյանի և կոնստրուկտոր` Ս. Բաղդասարյանի նախագծով և համարվում էր ԽՍՀՄ մոդեռնիստական ճարտարապետության նմուշներից մեկը:
