ԱՄՆ Պետքարտուղարությունն երկարացրել է զգուշացման գործողությունը, որի համաձայն երկրի քաղաքացիներին խորհուրդ չի տրվում առանց ծայրահեղ անհրաժեշտության այցելել Իրան: «Իրանի իշխանությունն անհիմն կերպով ձերբակալել է ԱՄՆ քաղաքացիներին տարբեր մեղադրանքներով՝ ներառյալ լրտեսության մեղադրանքներն ու սպառնալիքի ստեղծումն ազգային անվտանգության համար»,-ասվում է Պետքարտուղարության ծանուցման մեջ:
Պետքարտուղարությունը հիշեցնում է, որ չի կարող հյուպատոսական ծառայություններ տրամադրել իր քաղաքացիներին Իրանում, քանի որ դիվանագիտական հարաբերություններ չունի այդ երկրի հետ:
Նախորդ զգուշացումն արվել էր կես տարի առաջ՝ մայիսի 24-ին: Այժմ այդ ռեժիմի գործողությունն երկարացվել է, չնայած Իրանի միջուկային ծրագրի շուրջ ընթացող բանակցություններին:
Դիվանագիտական հարաբերություններն Իրանի ու ԱՄՆ միջև խզվեցին 1979 թվականին, իսլամական հեղափոխությունից հետո, երբ պատանդ վերցվեցին Թեհրանում ԱՄՆ դեսպանատան աշխատակիցները: ԱՄՆ դեսպանատան 52 աշխատակիցներ ազատ արձակվեցին 444 օր անց՝ 1981 թ.: Պատանդներն ազատ արձակվեցին Ալժիրի կառավարության միջնորդությամբ, Ռոնալդ Ռեյգանի երդմնակալության օրը: ԱՄՆ-ում Իրանի շահերը ներկայացնում է Պակիստանի դեսպանատունը:
