28 ապրիլի 2006 - 18:42 AMT
ԱՄՆ-ն չեն պատրաստվում հարձակվել Իրանի վրա, պնդում է Թուրքիայի ԱԳՆ ղեկավարը
«ԱՄՆ-ն չեն ծրագրում պատերազմել Իրանի դեմ: Գտնում եմ, որ ԱՄՆ-ն չեն նախաձեռնի որեւէ ռազմական գործողություն Իրանի դեմ: Վաշինգթոնը ՄԱԿ-ի գծով ավելացնում է ճնշումը այդ երկրի վրա»,- հայտարարել է Թուրքիայի արտգործնախարար Աբդուլա Գյուլը: Տեղեկացնելով ԱՄՆ պետքարտուղար Քոնդոլիզա Ռայսի հետ ունեցած իր հանդիպման արդյունքներին` Աբդուլա Գյուլը նշեց, որ, ինչպես հայտարարել է իր ամերիկացի գործընկերը, ԱՄՆ-ն չեն պատրաստվում հարձակվել Իրանի վրա: «Հանդիպման ընթացքում Ք. Ռայսը ասել է, որ Իրանի դեմ ռազմական գործողությունը չի հանդիսանում ԱՄՆ-ի գլխավոր նպատակը, բայց, այնուամենայնիվ, Ջորջ Բուշը այդ երկրի դեմ պատերազմը դիտում է որպես հնարավոր տարբերակներից մեկը: Ներկայումս մենք մտածում ենք լուրջ դաշինք ստեղծել Իրանի միջուկային ծրագիրը կանխելու համար: Այդ դաշինքը պետք է ստիպի Իրանին համագործակցել»,- ասել է Թուրքիայի արտգործնախարարը , հայտնում է ԱՊԱ-ն: