«Կովկասյան քառյակի» խորհրդարանների ղեկավարների հանդիպման հստակ ժամկետը դեռեւս որոշված չէ: Այդ մասին հայտարարել է Վրաստանի խորհրդարանի խոսնակ Նինո Բուրջանաձեն: «Հուսով եմ, որ Ռուսաստանի Դաշնության Խորհրդի խոսնակը, ինչպես նաեւ նրա գործընկերները Հայաստանից եւ Ադրբեջանից, կժամանեն Թբիլիսի, սակայն հանդիպման հստակ ժամկետը դեռեւս անհայտ է»,-ասել է նա: Անդրադառնալով ռուս-վրացական խորհրդարանական շփումների հեռանկարներին` Բուրջանաձեն նկատել է, որ իր կողմից «համագործակցելու ցանկություն կա»: «Դաշնության Խորհրդի խոսնակ Սերգեյ Միրոնովի հետ ձեւավորվել է նորմալ համագործակցություն: «Քառյակի» շրջանակներում մենք ուրախ կլինեինք հրավիրել նաեւ ԴԽ մյուս անդամներին: Հաճույքով Վրաստան եմ հրավիրում նաեւ Պետական Դումայի ղեկավարությանը»,-ասել է նա, հաղորդում է «ՌԻԱ «Նովոստի» գործակալությունը: