Դատախազությունը չի հաստատել Լևոն Հայրապետյանի դեմ խարդախության վերաբերյալ քրեական գործով մեղադրական եզրակցությունը: Այդ մասին հայտնել է նրա փաստաբան Ռուբեն Մարգարյանը:
Խարդախության մասին գործը Հայրապետյանի դեմ հարուցվել էր նախկին սենատոր Իզմեստևի մոր դիմումի համաձայն, որը մեղադրել էր գործարարին իրենից 700 հազար դոլար շորթելու մեջ:
«Այսօր դատախազը հայտնեց, որ խարդախության մեղադրանքով Հայրապետյանի դեմ հարուցված քրգործը վերադարձվել է Քննչական կոմիտե առանց մեղադրական եզրակացության հաստատման` անբավարար ապացույցների պատճառով»,-ասել է նա, հայտնում է ՏԱՍՍ-ը:
Ինչպես նշել է Մարգարյանը, ավելի վաղ պաշտպանությունը բազմիցս էր պնդել այս քրգործի կասեցումը, «քանի որ ապացույցները ցմահ բանտարկված նախկին սենատոր Իզմեստևի մոր` Թամարայի ցուցմունքի արտադրյալներն են միայն, իսկ վերջինս բավարար հիմքեր ունի Հայրապետյանին զրպարտելու համար»:
Ինչպես հայտնի դարձավ ավելի վաղ, Մոսկվայի քաղաքային դատարանը մերժել է գործարար և բարերար Լևոն Հայրապետյանի դատապաշտպանների բողոքի դիմումը տնային կալանքի ժամկետի երկարացման դեմ: Այսպիսով Հայրապետյանը կալանքի տակ կմնա մինչև սեպտեմբերի 15-ը, հայտնում է «Մոսկվա» քաղաքային նորությունների գործակալությունը դատարանում աղբյուրի վրա հղումով: «Դատարանը չի բավարարել բողոքարկման դիմումը` անփոփոխ թողնելով դատարանի որոշումը»,- ասել է գործակալության զրուցակիցը:
Հուլիսի սկզբին Մոսկվայի քաղաքային դատարանը մինչև սեպտեմբերի 15-ը երկարաձգեց «Բաշնեֆտ» նավթային ընկերության բաժնետոմսերի յուրացմանը մասնակցության համար մեղադրվող հայազգի գործարար Լևոն Հայրապետյանի տնային կալանքի ժամկետը: Քննությունը խնդրել էր երկարաձգել կալանքի ժամկետը՝ վկայակոչելով, որ գործի ոչ բոլոր մասնակիցներն են ավարտել գործի նյութերին ծանոթությունը:
Դատարանն իր որոշմամբ նաև մերժեց պաշտպանության խնդրանքը՝ գրավի դիմաց կամ ներկայանալու պարտավորությամբ ազատ արձակել Հայրապետյանին: «Հայրապետյանն անշարժ գույք ունի արտասահմանում, ինչպես նաև՝ ՌԴ-ի և Հայաստանի երկքաղաքացիություն Մեղադրյալը կարող է թաքնվել քննությունից և դատարանից: Բացի այդ, նա բավական գումար ունի, որոնց միջոցով խափանման ձևը փոխելու դեպքում կարող է ԶԼՄ-ներով քրեական գործի հետաքննության հետ կապված ակցիաներ իրականացնել՝ այդպիսով վարկաբեկելով քննությունը», - ասել է դատախազը: Հայրապետյանի փաստաբանը չի համաձայնել պատճառաբանություններին՝ հայտարարելով, որ այժմ պաշտպանյալը չունի անձնագիր, այդ պատճառով նա չի կարողանա թաքնվել:
Մինչդեռ ինքը Հայրապետյանը խնդրում է քրեական գործ հարուցել քննչական խմբի ղեկավար, փոխգնդապետ Ալեքսեյ Վեսելևի դեմ` ՌԴ ՔՕ 286 հոդվածով: Այդ մասին հայտնել է Հայրապետյանի փաստաբան Ռուբեն Մարգարյանը: Ըստ նրա, գործի նյութերից բխում է, որ քննիչ Վեսելևը 2014 թ. սեպտեմբերի 8-ին հանձնարարել է ոստիկանությանը մի շարք օպերատիվ-հետախուզական միջոցառումներ իրականացնել փաստաբանների դեմ, մասնավորապես, պարզել ավտոմեքենաների երթուղին ու նրաց ունեցվածքի մասին տեղեկություններ ստանալ: Ըստ դաշնային համապատասխան օրենքի, փաստաբանների դեմ օպերատիվ միջոցառումներ կարող են իրականացվել միայն դատարանի որոշմամբ, որը չի եղել:
«Այսպիսով, քննիչ Վեսելևը գերազանցել է իր լիազորությունները, առավել ևս, որ փաստաբանները չեն անցնում գործով ոչ որպես կասկածյալներ, ոչ որպես մեղադրյալներ»,-ասել է Մարգարյանը:
Նա նշել է, որ գեներալ-լեյտենանտ Շչուկինը մերժել է այս հարցով Հայրապետյանի դիմումը` «անհիմն լինելու պատճառով»:
«Ուստի Լևոն Հայրապետյանը բողոքի դիմում է ներկայացրել Քննչական վարչության պետ Բաստրիկինի և գլխավոր դատախազ Յուրի Չայկայի անունով, ինչպես նաև դիմում է ներկայացրել դատարան»,-ասել է Մարգարյանը: Նա նշել է, որ իրենք դիմելու են նաև Փաստաբանների դաշնային պալատին և Մոսկվայի փաստաբանների պալատին` խնդրելով միջոցներ ձեռնարկել դադարեցնելու համար ապօրինի գործողությունները փաստաբանների դեմ` ներառյալ փաստաբաններին հետևելն ու փաստաբանների և հաճախորդի բանակցությունների ֆիքսումը:
2014 Հուլիսի 24-ին գործարար Լևոն Հայրապետյանին, որին կասկածում են հափշտակումների և «Բաշնեֆտի» բաժնետոմսերի ապօրինի օրինականացման մեջ, ՌԴ Քննչական կոմիտեն մեղադրանք ներկայացվեց ՌԴ ՔՕ 160 (յուրացում և վատնում) ու 174 (փողերի լվացում) հոդվածների հատկանիշներով:
Ըստ իրավապահ մարմիններին մոտ աղբյուրի, յուրացումն այս գործում միջնորդական պարգևավճարն է, որը Հայրապետյանը ստացել է «ԱՖԿ Սիստեմա»-ին բաշկիրյան նավթային բաժնեմասերի վաճառքի գործարքից: Գումարը կարող է կազմել մոտ 50 մլն դոլար: Որպես հիմնական կասկածյալ անցնում է Բաշկիրիայի նախկին նախագահի որդին՝ Ուրալ Ռահիմովը: Հայրապետյանն այդ գործում համարվում է նրա գլխավոր հանցակիցը:
Հայրապետյանի միջնորդության մասին ցուցմունք է տվել ցմահ բանտարկության դատապարտված Բաշկիրիայից ընտրված նախկին սենատոր Իգոր Իզմեստևը, որը հայտարարել է, թե լսել է Ուրալ Ռահիմովից Բաշկիրիայի վառելիքաէներգետիկ համալիրի կառույցները «ԱՖԿ Սիստեմա»-ի սեփականատեր Վլադիմիր Եվտուշենկովին վաճառելու ցանկության մասին: Ըստ նրա, նաև քննարկվել է որպես միջնորդ պարոն Հայրապետյանին ներգրավելու հնարավորությունը: Այս հայտարարության հիման վրա էլ ձերբակալվել է Հայրապետյանը, առավել ևս, որ քննությանը հայտնի է դարձել 50 մլն դոլարի մասին, որն իբր Հայրապետյանը ստացել է որպես միջնորդ: