Հայաստանի պաշտպանության նախարար Սերժ Սարգսյանը եռամսյա արձակուրդ կգնա, եթե գլխավորի, 2003 թվականի փետրվարի 19-ին կայանալիք նախագահական ընտրություններում հանրապետության ղեկավարի պաշտոնի համար առաջադրված, ՀՀ գործող նախագահ Ռոբերտ Քոչարյանի նախընտրական շտաբը: «Նման երկարաժամկետ արձակուրդ ինձ հասնում է օրենքով, քանի որ ավելի քան երկու տարի չեմ հանգստացել»,- ասել է նա: Ինչպես նախատեսված է օրենքով, այդ ընթացքում բանակի գործերով կզբաղվի Հայաստանի պաշտպանության նախարարի տեղակալ, երկրի զինված ուժերի գլխավոր շտաբի պետ Միքայել Հարությունյանը: Զինվորական անձի միջամտությունը նախընտրական գործընթացին արգելող օրենքի կապակցությամբ` նախարարը ընդգծել է, որ ինքը ոչ թե զինվորական, այլ քաղաքացիական անձ է: «Եթե ես ուսադիրներ կրեի, ապա չէի զբաղվի քաղաքականությամբ»,- հայտարարել է նա: Իր նշանակումը Ռոբերտ Քոչարյանի նախընտրական շտաբի պետ նախարարը համարում է ընտրական գործընթացին բանակի միջամտությունը բացառող լրացուցիչ երաշխիք: