Մյուռոնօրհնության առթիվ Մայր աթոռ են ժամանել քրիստոնեական եկեղեցիների ներկայացուցիչներ, թեմակալ առաջնորդներ:
Ամենայն հայոց կաթողիկոս Գարեգին Բ-ի նախագահությամբ և ժամանած հոգևորականների ու բարերարների մասնակցությամբ սեպտեմբերի 28-ին Հայոց ցեղասպանության զոհերի հիշատակը հավերժացնող անմար կրակի շուրջ կատարվեց բարեխոսական կարգ:
Ծիծեռնակաբերդի համալիրում անմեղ զոհերի համար աղոթք հնչեցրեց Ֆրանցիսկոս պապի անունից կաթոլիկ եկեղեցու Արևելյան եկեղեցիների ժողովի նախագահ կարդինալ Լեոնարդո Սանդրին:
«Ուզում եմ խոսել Հայոց ցեղասպանության զոհերի հետ, ասել, որ դուք Աստծո ընկերն եք: Մենք կաղոթենք Աստծուն Հայաստանի համար, հայ առաքելական եկեղեցու համար` Ամենայն հայոց կաթողիկոսի գլխավորությամբ, Հայաստանում բոլոր քրիստոնյաների համար: Աղոթում եմ, Աստված, այս երկրի քրիստոնյաների համար, ով նախկինում տառապել է մահվան ճիրաններում»,- ասել է Լեոնարդո Սանդրին:
Բարեխոսական կարգից հետո քրիստոնեական եկեղեցիների 39 պետը և ներկայացուցիչը, Մեծի տանն Կիլիկիո կաթողիկոս Արամ Ա-ին ներկայացնող գերաշնորհ Տ. Մուշեղ արքեպիսկոպոս Մարտիրոսյանը, Կոստանդնուպոլսի հայոց պատրիարքական փոխանորդ գերաշնորհ Տ. Արամ արքեպիսկոպոս Աթեշյանը, Մայր աթոռում պաշտոնավարող եպիսկոպոսներ, հայ եկեղեցու թեմակալ առաջնորդներ և նվիրապետական աթոռների միաբաններ շրջայց են կատարել Հայոց ցեղասպանության թանգարան-ինստիտուտում:
