Air France ավիաընկերությունը հաստատել է, որ Վաշինգտոնից և Լոս Անջելեսից Փարիզ ուղևորվող ինքնաթիռները ստիպված են եղել փոխել ուղղությունը` «թռիչքի ժամանակ հեռախոսով ստացած անանուն սպառնալիքների պատճառով»:

«Անվտանգության նկատառումներից ելնելով Air France-ը որոշում է կայացրել վայրէջք կատարել»,-ասվում է ընկերության հայտարարության մեջ, հայտնում է ՌԻԱ Նովոստին:

Ավելի վաղ հայտնի դարձավ, որ Air France-ի 2 ինքնաթիռ ստիպված է եղել հարկադիր վայրէջք կատարել պայթյունի սպառնալիքի պատճառով: Ըստ KSL հեռուստաալիքի, Լոս Անջելեսից Ֆրանսիա ուղևորվող 65 չվերթն իրականացնող A-380 օդանավը ուղղություն է վերցրել դեպի Սոլթ Լեյք Սիթի` ռումբի մասին սպառանալիքից հետո: Ինքնաթիռում 497 ուղևոր կար: Ինչպես հայտնել է CBC հեռուստաալիքը, Վաշինգտոնից Փարիզ թռչող Boeing 777-ը հարկադիր վայրէջք է կատարել Գալիֆաքսի օդանավակայանում: Ինքնաթիռում 298 ուղևոր է եղել:

Ինքնաթիռները բարեհաջող վայրէջք են կատարել, ուղևորները տարհանվել են: Իշխանությունները ստուգում են սպառնալից ազդանշանները:

Ֆրանսիայի մայրաքաղաք Փարիզում նոյեմբերի 13-ի երեկոյան 7 ահաբեկչական հարձակում է իրականացվել։ Ըստ վերջին տվյալների, «Բատակլան» թատրոնում, «Ստադ դե Ֆրանս» ստադիոնի մոտակայքում ու Փարիզի ևս 5 այլ կետում միաժամանակյա հարձակումների ընթացքում զոհվել է 132 մարդ։ Ֆրանսիայում նախագահի հրամանով ատրակարգ դրություն է հայտարարված:

Ֆրանսիայի նախագահ Օլանդը պատերազմ է հայտարարել է ահաբեկչական «Իսլամական պետությանը», որը ստանձնել է հարձակման պատասխանատվությունը: Ֆրանսիայի օդուժը հարվածներ է հասցնում Սիրիայում գրոհայինների դիրքերին: