Թուրքիայի կառավարությունը պետք է անհապաղ դուրս բերի զորքն Իրաքից առանց որևէ նախապայմանի, ասվում է Արաբական պետությունների լիգայի (ԱՊԼ) հայտարարության մեջ: Կազմակերպության ներկայացուցիչներն արտահերթ նիստ էին գումարել Կահիրեում դեկտեմբերի 24-ին:
«ԱՊԼ-ն դատապարտում է Թուրքիային Իրաքի տարածք զորք մտցնելու համար և պահանջում է Թուրքիայի կառավարությունից անհապաղ դուրս բերել այն առանց որևէ պայմանի»,-ասվում է ԱՊԼ որոշման մեջ, որը հրապարակել է արաբական կազմակերպության գլխավոր քարտուղարի տեղակալ Ահմեդ բեն Հելլին:
Իրաքի ԱԳՆ ղեկավար Իբրահիմ ալ Ջաֆարին հայտարարել է, որ ԱԳ նախարարների որոշումը միաձայն է եղել, հայտնում է ՌԻԱ Նովոստին:
ԱՊԼ արտահերթ նիստը գումարվել էր Իրաքի խնդրանքով:
Ավելի վաղ Թուրքիայի ԱԳՆ-ն հայտարարել էր, որ երկիրը շարունակելու է Իրաքի Նայնավա նահանգի Բաշիքա ճամբարից թուրքական զորքերի դուրսբերումը, իսկ Թուրքիայի փոխվարչապետ Նուման Քուրթուլմուշը նշել է, որ Բաշիքայի զորակազմի մի մասը տեղափոխվել է այլ շրջան, և իրաքյան կառավարությունը դրական է գնահատել այդ որոշումը:
Սակայն դրան հաջորդեց Թուրքիայի ԱԳ նախարար Ահմեդ Դավութօղլուի հայտարարությունն այն մասին, որ թուրքական ռազմական ներկայությունն Իրաքում կպահպանվի մինչև «Իսլամական պետություն» ահաբեկչական խմբավորումից Մոսուլի ազատագրումը:
Դեկտեմբերի 4-ին թուրքական իշխանությունները 130 զինվորական են գործուղել Մոսուլի շրջան` վարժեցնելու համար իրաքցի քրդերի մարտիկներին: Զորակազմում ներգրավվծ է նաև զրահատեխնիկա: Բաղդադը գնահատել է դա որպես Իրաքի ինքնիշխանության խախտում: «Թուրքիայի զինված ուժերը, որոնք տեղակայված էին Մոսուլի հարևանությամբ, ներխուժել են երկիր առանց համաձայնեցման և պետք է անհապաղ դուրս բերվեն»,-ասվում էր Իրաքի վարչապետի հայտարարության մեջ:
