Ռուսաստանի ֆինանսատնտեսական վիճակի վատթարացման դեպքում հնարավոր է, որ Հայաստանը չստանա Կրեմլի խոստացած վարկերը՝ այդ թվում սպառազինության եւ ատոմակայանի վերանորոգման համար: Այս մասին հունվարի 20-ին ասել է ֆինանսների առաջին փոխնախարար Պավել Սաֆարյանը:

«Իհարկե, եթե Ռուսաստանում վիճակը շատ վատանա, հնարավոր է, որ նաև չտրամադրեն», - ասել է Սաֆարյանը, հաղորդում է «Ազատություն» ռադիոկայանը:

2015-ին Հայաստանն ու Ռուսաստանի կնքեցին երկու խոշոր վարկային պայմանագիր, որոնց համաձայն Մոսկվան պետք է $270 մլն՝ տրամադրեր Մեծամորի ատոմակայանի նորոգման և $200 մլն՝ սպառազինության ձեռքբերման համար: Սակայն նավթի գների շարունակվող անկումը ծանր դրության մեջ են դրել Ռուսաստանի տնտեսությունը՝ հարկադրելով Կրեմլին օգտագործել նախորդ տարիներին կուտակած արժութային պահուստները:

Հունվարի 18-ին Ռուսաստանի ֆինանսների փոխնախարար Սերգեյ Ստորչակը ըստ էության չբացառեց, որ Մոսկվան կարող է չկատարել ստանձնած վարկավորման պարտավորությունները:

«2015-ին կնքվել են բավականին շատ վարկային համաձայնագրեր: Խոշոր պարտավորություններ ենք ստանձնել, և վարկավորման պարտավորությունները չկատարելը ավելի մեծ խայտառակություն է, քան վարկի մարումը ձգձգելը», - ՏԱՍՍ լրատվական գործակալության փոխանցմամբ, ասել է ռուսաստանցի պաշտոնյան՝ հավելելով, որ երկրի բյուջեն լարված վիճակում է, և նոր վարկերի տրամադրման հավանականությունը շատ փոքր է: