Արգենտինայի ֆուտբոլի հավաքականի ավագ Լիոնել Մեսսին հայտարարել է, որ այլևս հանդես չի գա ազգային թիմի կազմում: «Ինձ համար մասնակցությունը ազգային հավաքականի խաղերին ավարտված է: Ես արեցի այն ամենն, ինչ կարող էի, սակայն, շատ ցավալի է, չկարողացա չեմպիոնության հասնել»,-ասել է ֆուտբոլիստը լրագրողներին, հայտնում է BBC-ին:
ԱՄՆ-ում Արգենտինայի և Չիլիի միջև հանդիպման հիմնական և լրացուցիչ ժամանակն ավարտվեց առանց արդյունքի, իսկ 11-մետրանոցների շարքում չիլիացիները հաղթանակի հասան 4:2 հաշվով: Մեսսին չիրացրեց պենալտին: Այդպիսով Արգենտինայի հավաքականն անընդմեջ երրորդ խոշոր պարտությունը կրեց խոշոր մրցաշարերի եզրափակչում:
29-ամյա Լիոնել Մեսսին իր մասնագիտական ամբողջ կարիերայի ընթացքում հանդես է գալիս «Բարսելոնա» ակումբի կազմում: Նրա մասնակցությամբ թիմը 4 անգամ հաղթել է Չեմպիոնների լիգայում: Մեսսին 5 անգամ «Ոսկե գնդակի» է արժանացել, որը հանձնվում է աշխարհի լավագույն ֆուտբոլիստին:
