Հայ ռեժիսոր Վարդան Հովհաննիսյանի «Մարդկային պատմություններ պատերազմի եւ խաղաղության ժամանակ» ժապավենը մրցանակի է արժանացել Նյու Յորքի Tribeca Film Festival կինոփառատոնի փաստագրական ֆիլմերի «Նոր անուններ» անվանակարգում: Ֆիլմը, որը նկարահանվել է 2006 թվականին «Բարս մեդիա» կինոստուդիայում, պատմում է Ղարաբաղյան պատերազմի մասին: Վարդան Հովհաննիսյանը կստանա նաեւ 25 հազար դոլար դրամական պարգեւ, հաղորդում է «Ազատություն» ռադիոկայանը:

Tribeca կինոփառատոնը հիմնադրվել է 2002 թվականին Ռոբերտ դե Նիրոյի, Ջեյն Ռոսենթալի եւ Գրեգ Հաթքոֆիի նախաձեռնությամբ` նպատակ ունենալով ֆիլմերի, երաժշտության միջոցով նպաստել 2001-ի սեպտեմբերի 11-ի ողբերգական իրադարձություններից հետո Մանհեթենի աշխուժացմանը:

Այս տարի անցկացված վեցերորդ կինոփառատոնում ցուցադրվել է 40 երկրի 275 ֆիլմ, այդ թվում Lեւոն Գրիգորյանի «Հիշողություններ Սայաթ-Նովայի մասին» վավերագրական ֆիլմը: