Հայաստանը կկարողանա մեծ թվով հնդիկ զբոսաշրջիկների հետաքրքրել, եթե Բոլիվուդը գոնե մեկ ֆիլմ նկարահանի այնտեղ: Այսպիսի կարծիք է հայտնել Հնդկաստանում ՀՀ պատվավոր հյուպատոս Եշվարան Շիվկումարը:
«Հայաստանը հիասքանչ է, և եթե Բոլիվուդն այստեղ գոնե մեկ ֆիլմ նկարահաներ, բազում հնդիկներ կայցելեին երկիր: Ես ընդհանրապես կարծում եմ, որ Հայաստանն ավելի գրավիչ է զբոսաշրջիկների համար, քան Եվրոպան»,-ասել է Շիվկումարը լրագրողներին ՀՀ ԱԱՊ և Հնդկաստանի ԱԱՊ ֆեդերացիայի միջև գործակցության խորացման մասին համաձայնագրի ստորագրումից հետո, գրում է «Նովոստի Արմենիան»:
Ըստ Շիվկումարի, հնդկական բիզնեսը չափազանց հետաքրքրված է Հայաստանով:
«Ստորագրված համաձայնագիրը թույլ կտա ընդլայնել առևտրային կապերը, ինչպես նաև հարաբերություններ հաստատել գործարարների միջև: Հնդկաստանը շահագրգռված է ներդրումներ կատարել Հայաստանի ՏՏ, ենթակառուցվածքների, զբոսաշրջության ոլորտներում»,-պասել է Շիվկումարը:
Ըստ նրա, Հայաստանը հետաքրքրում է Հնդկաստանին ոչ միայն որպես առանձին երկիր, այլ նաև որպես կամուրջ դեպի ԵՏՄ և Արևելյան Եվրոպայի երկրների շուկաներ: Նա հիշեցրել է, որ կան հնդկական ընկերություններ, որոնք հաջողության են հասել Հայաստանում:
Հայաստանում է գտնվում է Հնդկաստանի ԱԱՊ ֆեդերացիայի պատվիրակությունը, որի կազմում 11 ընկերություն է ընդգրկված գյուղատնտեսության, գյուղմթերքի վերամշակման, շինարարության, հյուրանոցային բիզնեսի ոլորտներից:Պատվիրակությունը Հայաստանում կլինի մինչև սեպտեմբերի 30-ը:
