Ռուսաստանն ու Թուրքիան երկու երկրների նախագահներ Վլադիմիր Պուտինի և Ռեջեփ Թայիփ Էրդողանի հոկտեմբերի 10-ին կայացած բանակցությունների արդյունքում կարողացել են զգալի առաջընթաց գրանցել գազի ոլորտում նախկինում չլուծված և վիճելի բոլոր հարցերի կարգավորման ուղղությամբ:

Մասնավորապես, հոկտեմբերի 10-ին էներգետիկայի նախարարները միջկառավարական համաձայնագիր են կնքել «Թուրքական հոսքի» իրագործման վերաբերյալ, դրանով իսկ շարունակելով գրեթե 2 տարի առաջ սկսած գործը: Բացի այդ, կողմերը կարողացել են համաձայնեցնել Թուրքիային տրամադրվող զեղչը ռուսական գազի համար:

«Թուրքիան ձգտում է տարանցիկ միջանցք դառնալ Եվրոպայի համար և մտադիր է ՌԴ հետ էներգետիկ միջանցք ստեղծել էներգառեսուրսները Եվրոպա հասցնելու համար: Մենք դրական ենք գնահատում «Թուրքական հոսք» նախագիծը, որը մշակում է Ռուսաստանը: Այդ գազամուղով գազը կհասնի Բալկաններ անմիջապես Սև ծովով»,-ասել է Թուրքիայի նախագահ Ռեջեփ Թայիփ Էրդողանը ՌԴ նախագահ Վլադիմիր Պուտինի հետ բանակցությունների ավարտին:

«Թուրքական հոսք» գազատարը կոչված է ռուսական գազը հասցնել Եվրոպա, սակայն նախագիծը սառեցվել էր նույնիսկ ռուս-թուրքական հարաբերությունների կտրուկ վատթարացումից առաջ: Նախագիծը հարցականի տակ հայտնվեց նոյեմբերի 24-ին թուրքական օդուժի կողմից ռուսական Սու-24-ի խոցումից և դրան հաջորդած ՌԴ պատժամիջոցների լույսի ներքո:

Նախագծի ընդհանուր արժեքը գնահատվում է 11,4 մլրդ եվրո, առաջին հատվածինը` 4,3 մլրդ եվրո: