Կայացել է Street Workout-ի Հայաստանի չորրորդ առաջնությունը, որին մասնակցել են Երևանի, հանրապետության տարբեր մարզերի, քաղաքների և Արցախի մոտ երեք տասնյակ մարզիկ:

Այս մարզաձևը վերջին տարիներին լայն տարածում է ստանում և Street Workout-ով սկսել են նաև աղջիկները զբաղվել: Ի դեպ, վերջինները Հայաստանի առաջնությունում ցուցադրական ելույթներ են ունեցել, գրում է Aravot.am-ը:

Վարժասարքերի վրա առաջին փուլում ուժային և տեխնիկական համալիր վարժությունների կատարման արդյունքով մրցավարներն ընտրել են յոթ լավագույնին, որոնք եզրափակչում որոշեցին հաղթողին ու մրցանակակիրներին:

Ըստ երկու փուլում վաստակած միավորների, Հայաստանի չեմպիոն է դարձել Սերգեյ Թևոսյանը՝ Վերին Արտաշատից: Մրցանակակիրների եռյակը կազմեցին Արամ Վարդանյանը (Երևան) և Յուրա Մանուկյանը (Տաշիր): Թևոսյանը եկող տարվա ամռանը Հայաստանը կներկայացնի աշխարհի առաջնությունում, որն ամենայն հավանականությամբ կկայանա Մոսկվայում:

Street Workout մարզաձևը տարածվել է Հայաստանում 2012-ից: Ամեն տարի անցկացվում էWorkout Fest փառատոնը: