Բաքվում կալանքի տակ պահվող բլոգեր Ալեքսանդր Լապշինի փաստաբանը հանդիպել է իր պաշտպանյալի հետ: Այդ մասին հայտնել է Լապշինի փաստաբան Էդուարդ Չերնինը, հաղորդում է APA.az-ը:
Նրա խոսքով՝ մոտ ժամանակներս Լապշինի մտերիմները կհանդիպեն նրա հետ։
«Լապշինը հարցնում է, թե երբ է ավարտվելու քննությունը և երբ է գործն ուղարկվելու դատարան: Կամ տոների ժամանակ, կամ դրանից հետո նրա մայրը և այլ մտերիմներ կկարողանան հանդիպել նրա հետ»,- ասել է փաստաբանը:
Չերնինը նշել է, որ քննության ավարտի ժամկետը դեռ հայտնի չէ:
Փետրվարի 7-ին Բելառուսի Գերագույն դատարանն ուժի մեջ է թողել ՌԴ և Իսրայելի քաղաքացի Ալեքսանդր Լապշինին Ադրբեջանին արտահանձնելու որոշումը: Նույն օրը նա տեղափոխվել է Բաքու և այժմ գտնվում է մեկուսարանում:
Ավելի վաղ Եվրոպայի խորհրդի լրագրողների պաշտպանության և անվտանգության հարցերով ինտերնետային հարթակում բլոգեր Ալեքսանդր Լապշինի Ադրբեջանում կալանավորման վերաբերյալ ահազանգ է հրապարակվել: