ԱՄՆ փոխնախագահ Մայք Փենսն այցելել է Կորեական թերակղզին բաժանող ապառազմականացված գոտի և հայտարարել է, որ Վաշինգտոնի «ռազմավարական համբերությունը» ՀԿԺՀ հարցում սպառվել է:
Ապառազմականացված գոտին 4-կիլոմետրանոց տարածք է, որը կիսում է Կորեական թերակղզին, գոտու մեջտեղով է անցնում ռազմական սահմանազատող գիծը:
Փոխնախագահը նաև ասել է, որ Հյուսիսային Կորեան չպետք է կասկածի, որ ԱՄՆ-ն վճռական է դաշնակիցներին աջակցելու գործում: Փենսի այցը Հարավային Կորեա 3 օր կտևի և անցնում է ՀԿԺՀ հետ այդ երկրի լարվածության ֆոնին:
Քննարկվում է ճնշման սաստկացումը Փհենյանի հանդեպ և նորագույն հակահրթիռային THAAD համակարգերի տեղակայման հարցը, հայտնում է ՌԻԱ Նովոստին Ռյոնհափ գործակալության վրա հղումով:
Իրավիճակը Կորեական թերակղզում սրվել է Հյուսիսային Կորեայում միջուկային փորձարկումների պատճառով: ԱՄՆ-ն հարվածային խումբ է գործուղել տարածաշրջան «Կառլ Վինսոն» ավիակրի գլխավորությամբ, իսկ Թրամփը հայտարարել է, որ ԱՄՆ-ն «կլուծի Հյուսիսային Կորեայի հարցը»:
