«Հայաստան» համահայկական հիմնադրամի 10-րդ հեռուստամարաթոնի ընթացքում, որը նոյեմբերի 22-ին տեղի ունեցավ Լոս Անջելեսում, նախնական տվյալներով հավաքվել է 15 միլիոն 275 հազար դոլար: Դրամահավաքին, որի միջոցները կհատկացվեն Հայաստանի եւ ԼՂՀ գյուղական համայնքների զարգացմանը, մասնակցել են ԱՄՆ-ի, Եվրոպայի, Ասիայի եւ Միջին Արեւելքի հայերը:

Նշենք, որ նոյեմբերի 14-16-ին Հայաստանում, նոյեմբերի 15-18 եվրոպական երկրներում եւ Արգենտինայում անցել են հեռախոսամարաթոններ, որոնց ընթացքում հավաքվել է 1 միլիոն 400 հազար եվրո եւ 250 հազար դոլար: Դրամահավաքի տեսակետից ռեկորդային է համարվում 2006 թվականը, երբ «Արցախի վերածնունդ» ծրագրի համար հավաքվեց 13, 7 մլն դոլար:

«Հայաստան» համահայկական հիմնադրամը սահմանվել է 1992 թվականին Հայաստանի նախագահի հրամանագրով: Իր գործունեության 15 տարվա ընթացքում իրագործվել են Հայաստանի եւ Լեռնային Ղարաբաղի զարգացման ծրագրեր 165 մլն դոլար արժողությամբ: Հիմնադրամի հոգաբարձուների խորհուրդը գլխավորում է ՀՀ նախագահը, գործադիր տնօրենն է Վահե Աղաբեկյանցը: